Frá því að heimsfaraldur kórónuveirunnar skall á hefur starfsfólki fækkað í öllum þremur megingreinum iðnaðarins samkvæmt greiningu Samtaka iðnaðarins. Þessar megingreinar eru mannvirkjagerð, framleiðsluiðnaður og hugverkaiðnaður. Höggið er minna nú en í fyrri niðursveiflum vegna þeirra aðgerða sem stjórnvöld hafa gripið til.

Fréttablaðið skýrir frá þessu í dag. Fram kemur að ef rétt verður haldið á spöðunum geti iðnaðurinn orðið helsti drifkraftur viðspyrnu að heimsfaraldrinum loknum en það var hann einnig eftir bankahrunið.

„Verði samkeppnishæfnin tryggð getum við séð næstu ár drifin áfram að stórum hluta vegna vaxtar í iðnaði,“

er haft eftir Ingólfi Bender, aðalhagfræðingi Samtaka iðnaðarins. Hann sagði jafnframt að áhersla hafi verið lögð á nýsköpun og það sé ánægjulegt að sjá þær breytingar, sem hafa átt sér stað í starfsumhverfi hennar hér á landi, skila sér inn í reksturinn og dreifast víðs vegar um hagkerfið.

Fram kemur að á tólf mánuðum, fram til ágúst á þessu ári, hafi starfsfólki í einkageiranum fækkað um 19.000. Á sama tíma hefur opinberum störfum fjölgað, að hluta vegna átaksverkefna sem stjórnvöld hafa hrundið úr vör.

Í ferðaþjónustu hefur starfsfólki fækkað um 35% en 4% í sjávarútvegi. Í greinum iðnaðarins er heildarfækkunin 7% en það eru 3.400 störf.