Starf útvarpsstjóra var auglýst þann 15. nóvember síðastliðinn og var upphaflegur umsóknarfrestur til 2. desember. Var hann síðan framlengdur til 9. desember. Listi yfir umsækjendur var ekki birtur líkt og venjulega, heldur haldið leyndum, þar sem nafnleysið átti að laða að hæfari umsækjendur.
Sú stefna brýtur reyndar í bága við persónuverndarstefnu RÚV, sem á grundvelli upplýsingalaga skyldar stofnunina til að að birta slíkan lista yfir umsækjendur. Úrskurðanefnd upplýsingamála hefur hinsvegar sagt að RÚV sé heimilt að halda listanum leyndum, en Umboðsmaður Alþingis hefur farið fram á að stjórn RÚV rökstyðji þessa ákvörðun sína enn frekar, enda sé RÚV í sömu stöðu og aðrar ríkisstofnanir.
Fékk stjórn RÚV frest til 7. janúar til þess að skila inn rökstuðningi sínum, en samkvæmt skrifstofu Umboðsmanns Alþingis hefur enginn rökstuðningur borist enn, en hann rennur út á miðnætti á morgun.
Umsóknarferlið hjá Capacent um nýjan útvarpsstjóra mun líklega fara aftur af stað í vikunni og vonast er til að það verði afstaðið fyrir næstu mánaðarmót. Þetta segir Hilmar Garðar Hjaltason hjá Capacent, við Eyjuna í dag.
„Þetta tekur allt sinn tíma og verður ekki unnið í einhverri tímapressu, en nú eru hjólin að fara að snúast eftir jólafríið og markmiðið er að klára þetta fyrir mánaðarmótin,“
segir Hilmar.
Hann segir einnig að umsækjendur þurfi að fara í nokkrar umferðir viðtala áður en sá hæfasti verði valinn, en getur lítið gefið upp um hversu margir munu fá boðun í næstu umferð þar sem eftir eigi að taka þá ákvörðun.
Hann nefndi þó að margir umsækjendur hefðu bæst við eftir að tilkynnt var um framlengdan umsóknarfrest:
„Það var slatti sem bættist við eftir að fresturinn var framlengdur. Tilkynningin um það fór hinsvegar út áður en fresturinn rann út og því ómögulegt að segja til um hvort það var ástæðan fyrir fjölguninni eða ekki, en það var slatti sem bættist við.“
Alls 41 sótti um starfið, en meðal þeirra sem hafa staðfest umsókn sína eru Svanhildur Hólm Valsdóttir, aðstoðarmaður fjármálaráðherra, Kolbrún Halldórsdóttir, leikstjóri og fyrrverandi þingmaður VG, Herdís Kjerulf Þorgeirsdóttir, doktor í lögum, fyrrverandi ritstjóri og útgefandi og fyrrverandi forsetaframbjóðandi, Baldvin Þór Bergsson, dagskrárstjóri hjá RÚV, Steinunn Ólína Þorsteinsdóttir, leikkona og blaðamaður, Elín Hirst, fjölmiðlakona og fyrrverandi þingmaður Sjálfstæðisflokksins og Kristín Þorsteinsdóttir, fyrrverandi ritstjóri Fréttablaðsins og útgáfustjóri 365 miðla.
