Ásmundur Friðriksson, þingmaður Sjálfstæðisflokksins, segir að 17 hælisleitendur bíði í Flugstöð Leifs Eiríkssonar eftir flutningi til Reykjavíkur. Orðrómur um að auðvelt sé að fá hæli á Íslandi berist víða. Bendir hann á að mikill kostnaður sé af flutningi fólksins. Þetta kemur fram í færslu sem Ásmundur birti á Facebook í gærkvöld:
„Í Flugstöðinni bíða nú 17 hælisleitendur sem voru að koma til landsins í dag eftir flutningi til Reykjavíkur. Fiskisagan um að á Íslandi sé fólki veitt hæli fær byr undir báða vængi. Allt þetta fólk þarf að komast í einangrun til Reykjavíkur. Það þarf að gera í mörgum ferðum á bílum því fólkið má ekki vera saman nema hjón eða fjölskyldur. Þá taka 17 manns í einangrun eða sótthví töluvert húsrými og þyngja yfirlestað heilbrigðiskerfi.
Eigum við ekki nóg með okkur sjálf núna?“
Líflegar umræður spretta af þessu innleggi Ásmundar og Friðrik Erlingsson rithöfundur spyr hvort ekki sé nóg af tómu húsnæði. Margir taka undir með Ásmundi um að straumur hælisleitenda til landsins sé varhugaverður og kostnaðarsamur.
