Kolbrún Baldursdóttir borgarfulltrúi skrifar:

Smáhýsi fyrir heimilislausa í Reykjavík hafa verið til umræðu um skeið. Markmið með smáhýsum er að veita einstaklingum og pörum með fjölþættan vanda öruggt húsnæði.  Erfitt hefur reynst að finna þessum smáhýsum stað. Mikilvægt er að smáhýsin séu nálægt allri helstu þjónustu og almenningssamgöngum.

Ég er fulltrúi flokks, Flokks fólksins, sem berst fyrir mannréttindum og jafnrétti viðkvæmustu hópa okkar samfélags. Ein af aðaláherslum Flokks fólksins frá upphafi er að berjast fyrir því að allir hafi öruggt húsaskjól. Að eiga þak yfir höfuðið er ein af grunnþörfum fólks.

Það hafa ekki allir verið sáttir við að fá smáhýsin í nærumhverfið. Þeir sem hafa mótmælt því óttast þann hóp sem þarna muni búa. Hlusta ber á allar raddir, líka þeirra sem mótmæla. Vel kann að vera að almennt þurfi að auka þekkingu á málefnum heimilislausra á Íslandi og veita betri innsýn. Stundum nægja upplýsingar og fræðsla um málaflokkinn til að róa þá sem bera kvíðboga fyrir að fá þetta nýja búsetuúrræði í hverfið sitt.

Fyrir einhverja sem fá úthlutað smáhýsi er það e.t.v. fyrsta heimilið þeirra í langan tíma, staður þar sem þeir geta dvalið á í stað þess að vera stöðugt á ferðinni. Heimili er ekki einungis skjól fyrir kulda og vosbúð. Tengslin við heimilið er ekki síður háð því að viðkomandi finni að hann er velkominn á staðinn og í hverfið. Það getur komið fyrir alla að vera heimilislaus.

Ástæður þess að fólk verður heimilislaust til langs tíma eru oftast margþættar. Skylda samfélagsins er að sjá til þess að allir hafi þak yfir höfuð sitt, stað sem þeir geta kallað heimili sitt. Að búa í samfélagi kallar á samtryggingu. Þrátt fyrir þennan samfélagssáttmála okkar Íslendinga hefur grunnþjónustu oft verið ábótavant í borginni.

Ennþá, þrátt fyrir mörg góðærin, eru langir biðlistar í helstu þjónustu og einnig eftir félagslegu húsnæði. Fulltrúi Flokks fólksins fagnar þessu nýja búsetuúrræði og væntir þess að verðandi íbúar geti upplifað það sem heimili sitt, stað þar sem þeir geti fundið öryggi, frið og hvíld.

Kolbrún Baldursdóttir, borgarfulltrúi Flokks fólksins