Þórhildur Sunna Ævarsdóttir, þingmaður Pírata, og formaður stjórnskipunar- og eftirlitsnefndar Alþingis, sagði af sér formennsku í nefndinni á þingfundi í dag.
Tilefnið er að meirihlutinn standi í vegi fyrir frumkvæðisathugun á hæfi Kristjáns Þórs Júlíussonar:
„Tilraunir okkar í minnihluta stjórnskipunar- og eftirlitsnefndar til að sinna eftirlitshlutverki nefndarinnar hafa einungis orðið meirihlutanum tilefni til valdníðslu og linnulausra árása. Skírasta dæmið um þetta er hvernig meirihlutinn stendur í vegi fyrir frumkvæðisathugun á hæfi sjávarútvegsráðherra, en forsætisráðherra kallar það góða niðustöðu,“
sagði Þórhildur.
Hún sagði meirihlutann setja hættulegt fordæmi og veikja eftirlitshlutverk Aþingis með framgöngu sinni og ásakaði stjórnarmeirihlutann um þöggun og kúgun:
„Til að réttlæta þessa aðför sína kýs meirihluti nefndarinnar að draga persónu mína sífellt niður í svaðið og nota mig sem blóraböggul. Þessi aðferðarfræði, að skjóta sendiboðann er þaulreynd þöggunnar og kúgunar taktík.“
Hún greindi síðan frá því að hún segði af sér formennsku:
„Ég mótmæli þessari aðför, mér misbýður þetta leikrit og ég ætla ekki að taka þátt í því lengur. Formennsku minni í þessari nefnd er hér með lokið.“
Fyrsti varaformaður nefndarinnar er Líneyk Anna Sævarsdóttir, þingmaður Framsóknarflokksins.