„Eftir að bankastjórarstöður hættu að vera pólitískar hefur tækifærum til „virðulegrar útgöngu“ af vettvangi stjórnmálanna fækkað. Þeim mun enn fækka á næstu árum samþykki Alþingi frumvarp Guðlaugs Þórs Þórðarsonar utanríkisráðherra um sendiherraskipanir.“
Svo ritar Björn Jón Bragason í pistli sínum í helgarblaði DV þar sem hann fjallar um einn helsta vettvang pólitískra bitlinga í samtryggingakerfi stjórnmálanna hér á landi; sendiherrastöður.
Í pistlinum kemur fram að frumvarp utanríkisráðherra gæti verið þyrnir í augum þeirra stjórnmálamanna sem hafi séð fyrir sér þægilega innivinnu eftir harkið á þingi:
„Frumvarpið hefur mætt nokkurri andstöðu á Alþingi þó svo að hún fari ekki mjög hátt. Heimildir herma að ýmsir þingmenn telji að með frumvarpinu sé gert út um vonir þeirra sjálfra um sendiherrastöðu í framtíðinni. Í frumvarpinu er enn fremur gert að skyldu að embætti sendiherra verði auglýst og að umsækjendur skuli uppfylla lágmarks hæfisskilyrði. Þeir þurfi að hafa lokið háskólaprófi og hafa reynslu af alþjóða- og utanríkismálum,“
segir Björn Jón meðal annars.
Nánar er fjallað um málið í helgarblaði DV.