Kínversk stjórnvöld skulda svör varðandi upphaf kórónuveirunnar og athyglisvert er að þau reyni að koma í veg fyrir alla gagnrýni á viðbrögð sín við faraldrinum. Þetta kemur fram í leiðara Morgunblaðsins í dag.
Leiðarahöfundur ýjar einnig að því í dag að kórónuveiran hafi orðið til á rannsóknarstofu í Wuhan og vitnar þar í grunsemdir fyrrverandi forstjóra bresku leyniþjónustunnar MI6, Sir Richard Dearlove, sem viðraði þá skoðun sína við fjölmiðla fyrir helgi. Er hún byggð á rannsóknum tveggja vísindamanna frá Noregi og Bretlandi, sem töldu kórónuveiruna vera „blending“ tveggja mismunandi kórónuveira og hannaða til þess að berast auðveldlega í menn:
„Annar vísindamannanna gekk raunar lengra en Dearlove, og sagði við Telegraph að Kínverjar hefðu beinlínis greint rangt frá eða treglega um veigamikil atriði um uppruna kórónuveirunnar sem nýst gætu í baráttunni gegn henni.“
Þess skal getið að heilbrigðisyfirvöld hér á landi segja fullsannað að veiran sé ekki manngerð, hún hafi ekki verið búin til á tilraunastofu líkt og kenningar hafi verið uppi um.
„Hvernig er hægt að vera svo viss um þetta? Lausnin felst í því að skoða erfðaefni SARS-CoV-2″,
segir Jón Magnús Jóhannesson, deildarlæknir á Landspítalanum. Um þetta má lesa á Vísindavefnum.
Leiðarahöfundur tekur þó fram að hann ætli ekki að fullyrða um hvort niðurstöður þeirra kumpána séu réttar, en dregur fram viðbrögð Kína varðandi alla gagnrýni á faraldurinn:
„Þá má einnig íhuga í þessu samhengi, hvernig kínversk stjórnvöld hafa reynt að koma í veg fyrir alla gagnrýni á það hvernig þau sinntu kórónuveirufaraldrinum í upphafi. Hvers vegna voru þeir læknar í Wuhan sem reyndu að vara fólk við nýrri veiru teknir á teppið og sagt að halda sér saman? Þá er einnig athyglisvert hvernig Kínverjar hafa beitt sér af mikilli hörku gegn þeim sem hafa viljað rannsaka upphaf kórónuveirufaraldursins. Opinbera línan er jafnan sú, að fyrst þurfi að sigrast á faraldrinum áður en rannsókn fari fram, þar sem „núverandi andrúmsloft“ í umræðunni gæti verið skaðlegt rannsókninni. Með þessu er þó skautað framhjá því, að ein helsta ástæðan fyrir því að uppruni faraldursins krefst rannsóknar er að þar gæti einnig verið að finna leiðina til að sigrast á honum.“
Leiðarahöfundur minnist á að Kína hafi sett ofurtolla á ástralskar innflutningsvörur, en Ástralía hefur krafist óháðrar rannsóknar á upphafi kórónuveirunnar. Þá hefur kommúnistastjórnin einnig varað Kínverja við ferðalögum til Ástralíu, þar sem kynþáttatengdum árásum á fólk af asískum uppruna hefði fjölgað:
„Ekki þarf að fara mörgum orðum um það, að sú fullyrðing er hvergi nærri því að vera sannleikanum samkvæm. Aðrir sem hafa vogað sér að setja spurningarmerki við framferði kínverskra stjórnvalda í upphafi faraldursins hafa mátt þola það að vera sakaðir um „kaldastríðshugsunarhátt“, eða þá jafnvel að þeir fylgi bandarískum stjórnvöldum í blindni. Heiftin sem mætir þeim sem vilja spyrja eðlilegra spurninga vekur einungis frekari grunsemdir um að svörin þoli ekki dagsins ljós.“
Þá segir höfundur að Kína hafi það í hendi sér að upplýsa um málið og draga úr tortryggni og gagnrýni, með því að veita svör um málið.
„…fólk um allan heim þarf að fá svör við því hvernig og hvers vegna veiran fór af stað. Ætla má að Kínverjar geti veitt þessar upplýsingar eða í það minnsta aðstoðað við það. Þegar stórkostlega skaðleg veira er annars vegar verða allir að vinna saman að því að finna og veita svör við brýnum spurningum.“
Sendiherra Kína hér á landi hefur hingað til brugðist harkalega við leiðaraskrifum Morgunblaðsins í málinu og líkt ritstjóranum við Donald Trump. Þá hefur sendiherrann hvatt leiðarahöfund til frekari víðsýni:
„Við vonum innilega að Morgunblaðinu auðnist að verða víðsýnna, virða staðreyndir og láta af ómaklegum árásum á Kína.“
