Þórður Snær Júlíusson, ritstjóri Kjarnans og þingmaður Sjálfstæðisflokksins, Brynjar Níelsson virðast ekki mjög sáttir hvorn við annan þessa dagana. Í liðinni viku skrifaði Þórður Snær pistil í Kjarnanum um Samherja. Þar ræddi hann um skiptingu félagsins árið 2018 og fréttirnar sem hafa verið áberandi seinustu vikur er varða framsal Samherja frá foreldrum til barna.
Brynjar svaraði skrifum Þórðar í pistli sem birtist einnig á Kjarnanum. Hann sagði Þórð setja „met í rangfærslum og útúrsnúningi“ og sagði hann vitna í ónafngreinda heimildarmenn sem væru ekki búnir að kynna sér málin nægilega vel.
„Ritstjórinn hefur lengi verið upptekinn af hugtakinu gaslýsingu (e. gaslighting) sem felst í því að afvegaleiða, ljúga og hanna nýja atburðarás í þágu tiltekins málstaðar. Þannig skrifaði hann grein um þetta fyrirbæri sem birtist í Kjarnanum hinn 24. september 2017. Hugtakið hefur einnig verið þýtt sem villuljós í íslensku máli. Undir þetta fyrirbæri, sem ritstjóra Kjarnans er svo hugleikið, fellur einnig að sleppa meðvitað mikilvægum upplýsingum ef þær þjóna ekki þeim málflutningi sem er borinn á borð. Má segja að umrædd grein Þórðar Snæs eitthvert tærasta dæmi um gaslýsingu eða villuljós sem sést hefur í seinni tíð.
Þórður Snær virðist hafa sterkar skoðanir á þeim málum sem hann fjallar um sem blaðamaður og hefur jöfnum höndum skrifað fréttaskýringar og skoðanagreinar um umdeild mál. Hefur hann reglulega hoppað á milli þessara hlutverka í miðli sínum. Það virðist ekki þjóna málflutningi pistlahöfundarins Þórðar Snæs að upplýsa lesendur sína um að hluthafar Samherja hf. munu ekki komast hjá því að greiða milljarða króna í skatta vegna framsals hlutabréfa í fyrirtækinu til afkomenda sinna. Það verður hins vegar að segjast að það er býsna ódrengilegt af honum að fjalla ekkert um þá hlið málsins og gefa í skyn að því sé þveröfugt farið. Í því sambandi skiptir engu máli þótt hann skrifi undir hatti pistlahöfundar í umrætt sinn en ekki blaðamanns.“
Þórður svaraði pistli Brynjars og sagði hann vera úr hópi karla sem tala niðrandi um sig og Kjarnann. Hann segir þessa menn tala um hversu litlu máli Kjarninn skipti, en afsanna sjálfan sig með því að vera einmitt sífellt að hugsa um miðilinn.
„Hópur karla í stjórnmálum og fjölmiðlum hafa ríka þörf fyrir að skrifa niðrandi, og stundum illkvitnislega, um mig og Kjarnann. Aðallega er um að ræða menn úr svipaðri átt, með svipaða áferð, sem er mikið í mun að tala niður Kjarnann og leggja áherslu á að hann skipti engu máli. Að uppistöðu svara ég þeim ekki, en það er áhugaverð hugsunarvilla að vera stanslaust vanstilltur yfir einhverju sem þú telur ekki skipta neinu máli. Ég er ekki viðkvæmur fyrir því að trufla einhverja enda er það eðlilegur fylgifiskur þess sem ég starfa við.“
Þórður segist hafa þurft að fara í mál vegna meiðandi ummæla frá manni sem vildi ekki hætta að ræða um Kjarnann. Þar á hann líklega við um Hannes Hólmstein Gissurarson sem hann kærði árið 2017 fyrir brot á siðareglum Háskóla Íslands.
„Annað leiðarstef þessa hóps er að ég sé borgaður af einhverjum ótilgreindum útlendingum. Einn mannanna, háskólaprófessor, endurtók þetta svo oft án þess að geta sýnt fram á að staðhæfingar hans ættu sér stoð í raunveruleikanum að ég neyddist til að kæra hann fyrir háskólasiðanefnd til að fá hann til að hætta þessu. Það tókst, enda fullyrðingar mannsins meiðandi þvæla án innistæðu.“
Hann segir að Brynjar hafi stundað þetta niðurtal undanfarin ár og minnist þá á greinina sem hann skrifaði í vikunni. Hann segir að greinin sé upplýsandi, en ekki á þann hátt sem Brynjar ætlaði sér. Hann ákveður þó ekki að útskýra nánar afhverju, en hvetur fólk til að lesa þær báðar svo maður geti séð hvor beri hagsmuni almennings fyrir brjósti.
„Þingmaðurinn Brynjar Níelsson hefur verið í þessu ati undanfarin ár. Ég virðist trufla hann mikið og ekkert við því að gera. Nýlega skrifaði hann blaðagrein þar sem hann setti fram alvarlegar ásakanir á hendur mér í anda þess sem prófessorinn gerði. Að hér væri maður sem gengi laumulega erinda sérhagsmuna fjármagnseigenda gegn almannahagsmunum, og villti á sér heimildir í þeirri vegferð. Sigldi undir fölsku flaggi.
Í dag birtir Brynjar grein á ómerkilega miðlinum sem enginn les víst. Sem er sjálfsagt mál enda á skoðun hans fullt erindi í umræðuna. Raunar er hún afar upplýsandi, en á annan hátt en Brynjar ætlar.
Greinin er full af ótrúlegum útleggingum. En ég ætla að halda mig við þá línu að vera ekki að svara slíkum ávirðingum beint heldur hvet fólk til að lesa annars vegar grein Brynjars og hins vegar leiðarann sem er ástæða hennar. Það er hlekkur á hann inni í greininni. Í kjölfarið er hægt að mynda sér skoðun á því hvor okkar ber almannahagsmuni fyrir brjósti og hvor gengur erinda sérhagsmuna.“
