Sanna Magdalena Mörtudóttir, borgarfulltrúi Sósíalistaflokks Íslands, vill að lúxusíbúðir sem standa tómar í Reykjavík verði nýttar til að koma þaki yfir þá sem mest þurfa á húsnæði að halda. Því þurfi Reykjavíkurborg að taka yfir eignarhald þeirra á hagstæðu verði. Hún vill einnig að tóm hótel verði notuð undir hjúkrunarrými og námsmannaíbúðir. Hún hyggst leggja tillögu sína fram á fundi borgarstjórnar á morgun:

„Aðilarnir sem standa að baki umræddum íbúðum hafa átt í erfiðleikum með að selja þær og miðað við efnahagsástandið sem nú blasir við okkur er ekki fyrirséð að íbúðirnar verði eftirsóttar á því verði sem þær eru á. Því er lagt til að Reykjavíkurborg leitist við að taka yfir íbúðirnar og gera þær aðgengilegar fyrir þá hópa samfélagsins sem eru í mestri þörf fyrir húsnæði,“

segir Sanna.

Tóm hótel verði einnig nýtt

Hún vill einnig að þau hótel sem standi tóm vegna Covid-19 og munu standa tóm næstu mánuði og jafnvel ár, verði nýtt fyrir hjúkrunarrými og námsmannaíbúðir:

„Þá er einnig lagt til að Reykjavíkurborg skoði sama fyrirkomulag með stór hótel borgarinnar sem eru nú í byggingu og útfæri rýmin t.d. í námsmannagarða og hjúkrunarrými. Fjármála- og áhættustýringasviði verði falið að leita til þeirra sem hafa komið að fjármögnun og uppbyggingu ummræddra íbúða og eiga í viðræðum við þá fyrir hönd borgarinnar. Reykjavíkurborg samþykkir síðan að vinna með hagsmunaaðilum líkt og verkalýðshreyfingunni, Félagsbústöðum, Öryrkjabandalagi Íslands og Félagsstofnun stúdenta og samtökum eldri borgara um nýtingu íbúðanna.“

Í sjokki

Katrín Atladóttir, borgarfulltrúi Sjálfstæðisflokksins, segist á Twitter vera í sjokki yfir orðalaginu í tillögum Sönnu. Hún telur það ruglað hugarfar að hið opinbera taki yfir eignir fólks:

„Lýsir bara (að mínu mati rugluðu) hugarfari að tala um að hið opinbera „taki yfir eignarhald“ á eignum fólks.“

Sósíalistar eru með tillögu í borgarstjórn á morgun um „að taka yfir eignarhaldið á þeim íbúðum á hagstæðu verði“ og ég er í sjokki yfir orðalaginu.

(Átt er við óseldar „lúxusíbúðir“ í Reykjavík)

— Katrín Atladóttir (@katrinat) April 20, 2020