Ragnar Þór Ingólfsson, formaður VR, segir að þótt ákvæði lífskjarasamningsins um styttingu vinnuvikunnar, lækkun vaxta og fleiri atriði hafi gengið eftir sé lykilmálum á borð við húsnæðismálin enn ólokið og að samningnum verði sagt upp ef ekki verður staðið fyrir fyrirheit stjórnvalda um húsnæðismál.

Morgunblaðið skýrir frá þessu í dag.

„Þetta eru svo stór atriði að við getum ekki litið fram hjá þeim. Við erum að fara inn í maí og það stefnir í að ríkisstjórnin ætli ekki að afgreiða frumvörp um fyrstu kaupa lánin á íbúðum, um leiguverndina og bann við 40 ára verðtryggðum jafngreiðslulánum. Frumvörpin eru tilbúin. Það tók eitt og hálft ár að vinna þau. Þessi mál hafa ekki einu sinni verið lögð fram á þingi. Þau voru hluti af lífskjarasamningnum og ef þau verða ekki afgreidd er samningurinn fallinn af okkar hálfu.“

Er haft eftir honum í blaðinu í dag. Hann sagði einnig að ljóst sé að verðlagsþróun verði neikvæð næstu mánuði og misseri, birgjar séu að hækka verða á nauðsynjavörum um allt að 10 prósent og erlendir birgjar jafnvel um tugi prósenta. Gengið hafi þegar veikst um 17 prósent og muni veikjast enn frekar ef ekkert verður að gert. Af þessum sökum sé kaupmáttarhluti lífskjarasamningsins í algjöru uppnámi.