Samkvæmt ábatagreiningu starfshóps Reykjavíkurborgar um mótun ferðastefnu, voru tekjur borgarinnar af erlendum ferðamönnum 10,5 milljarðar króna árið 2018. Kostnaðurinn vegna ferðamanna nam hinsvegar 18,7 milljörðum, eða 8,3 milljörðum meira en tekjurnar.
Samkvæmt greiningunni var meðaleyðsla ferðamanna á sólarhring í Reykjavík árið 2018 37.693 krónur.
Þetta var kynnt fyrir borgarráði í gær og Fréttablaðið greinir frá.
Þar segir Þórdís Lóa Þórhallsdóttir, formaður borgarráðs, að Reykjavíkurborg líti ekki á kostnaðinn umfram tekjurnar sem tap, en telur þó niðurstöðuna sláandi.
Hún segir jafnframt kostnaðinn vel þess virði:
„Við sem erum að reka sveitarfélögin vitum að við erum ekki að fá miklar tekjur af ferðamönnum. Þó svo að sveitarfélögin séu pakkfull af fólki þá renna litlar tekjur til sveitarfélaganna. Bæði virðisaukaskattur og gistináttagjald rennur til ríkisins. Samband sveitarfélaga hefur unnið að því að gistináttagjaldið fari til sveitarfélaganna og það er inni í ríkisstjórnarsáttmálanum en það virðist enginn vera að flýta sér og við viljum bara benda á það augljósa í þessu. Þó að þessi mikli kostnaður fylgi ferðaþjónustunni er hún vel þess virði en eðlilegra væri að sveitarfélagið fengi til sín stærri hlutdeild af tekjunum sem ferðamaðurinn býr til,“
segir Þórdís við Fréttablaðið.
Samkvæmt greiningunni teljast tekjurnar vera fasteignagjöld fyrirtækja, aðgangseyrir í sundlaugar og listasöfn og tekjur Höfuðborgarstofu. Óbeinar tekjur teljast útsvar og fasteignagjöld starfsmanna sem sinna ferðaþjónustu.
Rekstur Höfuðborgarstofu og styrkveitingar teljast sem beinn kostnaður, en óbeinn kostnaður telst kostnaður við grunnþjónustu starfsmanna sem bætast í borgina með fjölgun ferðamanna, til dæmis vegna leikskóla og skóla, að sögn Þórdísar.