Samherji hefur sent bréf til stjórnar Ríkisútvarpsins og útvarpsstjóra vegna fréttar sem var flutt í síðari sjónvarpsfréttatíma RÚV fimmtudaginn 13. febrúar síðastliðinn. Í erindinu krefst Samherji afsökunarbeiðni og leiðréttingar á meiðandi fréttaflutningi.
Þetta segir í tilkynningu frá Samherja:
„Í umræddri frétt, sem fjallaði um þróunaraðstoð, var fullyrt að Samherja hefði tekist að afla sér kvóta í Namibíu með því að múta embættismönnum og að heimamenn hafi því ekki notið þeirrar þróunaraðstoðar sem Íslendingar hefðu veitt þeim á árum áður. Í erindi Samherja kemur fram að fullyrðing í fréttinni eigi sér enga stoð í raunveruleikanum og sé úr lausu lofti gripin. Koma hefði mátt í veg fyrir þetta ef Samherja hefði verið gefinn kostur á andsvörum áður en fréttin var flutt, eins og vinnureglur fréttastofu Ríkisútvarpsins geri áskilnað um. Ekki hafi verið haft samband við Samherja við vinnslu fréttarinnar þótt skýrt sé kveðið á um í áðurnefndum vinnureglum að þegar um sé að ræða alvarlegar ásakanir, eins og lögbrot, verði að gefa viðkomandi „möguleika til andsvara í sama fréttatíma eða geta þess að frásagnar af hans sjónarmiðum sé að vænta, náist ekki í viðkomandi.“
Í erindinu gerir Samherji jafnframt alvarlegar athugasemdir við framsetningu fréttarinnar:
„Þar var viðtal við erlendan viðmælanda um spillingu en látið líta út fyrir að umræðuefnið væri mál Samherja. Viðmælandinn minntist þó ekki einu orði á fyrirtækið eða starfsemi þess. Á meðan voru sýndar myndir af stjórnendum Samherja. Alvarlegast sé þó að í fréttinni hafi verið fullyrt að stjórnendur Samherja hafi gerst sekir um alvarlega refsiverða háttsemi með því að múta embættismönnum í Namibíu en þeir hafi hvorki verið sakfelldir né ákærðir fyrir slíka háttsemi. Þá sé enginn starfsmaður Samherja með réttarstöðu sakbornings vegna málsins. Er þess óskað að Ríkisútvarpið leiðrétti meiðandi ummæli í fréttinni 13. febrúar og biðjist afsökunar. Þá áskilur Samherji sér rétt til að höfða mál vegna þessara ummæla og annarra.“
