„Í núverandi ástandi á Landspítalanum líður fólk miklar kvalir og deyr jafnvel vegna vangetu Landspítalans að taka við sjúklingum frá bráðamóttökunni. Ef þessi breyting er möguleg verður að koma henni sem fyrst í framkvæmd því það er um velferð meðborgara okkar að ræða og jafnvel um líf þeirra,“

skrifar Gunnar Skúli Ármannsson, læknir á Landspítalanum í Fossvogi, í Morgunblaðið í dag hvar hann fjallar um vanda Landspítalans.

Stóra spurningin

Breytingin sem hann fjallar um er sú sem Reynir Arngrímsson, formaður Læknafélags Íslands, setti fram í grein, um að sem mest af skipulagðri starfsemi spítalans, valaðgerðir á borð við liðskiptiaðgerðir, yrðu færðar til einkaaðila:

„Stóra spurningin í mínum huga er, getur það verið að hægt sé að flytja þessa starfsemi frá Landspítalanum með mjög skömmum fyrirvara og leysa þannig vanda Landspítalans svo til strax,“

spyr Gunnar Skúli.

Pólitíkin þvælist fyrir

Hann segir stjórnmálamennina vera helsta vandamálið þegar kemur að heilbrigðiskerfinu hvar pólitískur réttrúnaður ráði ríkjum:

„Í raun er það skelfilegt að horfa upp á refskák stjórnmálanna þar sem eldri borgarar með beinbrot eða fjölþætt vandamál eru fórnarlömb átakanna. Til þess að talsmenn einkaframtaksins nái fram vilja sínum er hið opinbera kerfi svelt. Svo er annar hópur jafn sanntrúaður sem vill kæfa einkaframtakið samtímis og hið opinbera kerfi er svelt. Það virðist sem pólitískur rétttrúnaður skapi meiri vanlíðan fyrir eldri borgara okkar með beinbrot eða þá sem liggja fastir á bráðamóttökunni með fjölþætt vandamál en margt annað í heilbrigðiskerfi okkar,“

segir Gunnar og nefnir að aldraðir skattgreiðendur hafi ekki átt von á slíkum móttökum frá velferðarkerfinu sem þeir tóku þátt í að byggja upp.

Lausnin er ljós – Hvað tefur ?

Gunnar segir að stjórnmálamenn verði að brjóta odd af oflæti sínu og gera það sem rétt er og virðist beina orðum sínum að heilbrigðisráðherra, Svandísi Svavarsdóttur, sem hefur frekar viljað senda sjúklinga til Svíþjóðar í liðskiptiaðgerðir, fyrir þrefaldan kostnað, í stað þess að semja við einkaaðila:

„Ef hægt er að létta núna á Landspítalanum með því að flytja valaðgerðir til einkaaðila þannig að eldri einstaklingar þurfi ekki að þjást í 30 til 50 klst. með beinendana að nuddast saman á bráðamóttökunni þá verðum við að fara þá leið algjörlega án tillits til pólitískra skoðana. Bráðveikir sjúklingar Landspítalans verða að fá lausn sinna mála núna, það er það eina sem skiptir máli.“