Björn Leví Gunnarsson, þingmaður Pírata, hefur tekið saman upplýsingar og birt gögn um mætingu þingmanna í nefndarstörf, en upplýsingarnar liggja á vef Alþingis.

Hann greinir frá þessu á Facebook og tekur fram að Andrés Ingi Jónsson, fyrrverandi þingmaður VG og nú óháður, hafi mætt ansi seint á einn fund:

„Einhver gæti rekið augun í fyrstu færsluna og séð að Andrés Ingi mætti fjórum klukkutímum og 10 mínútum of seint á fund þann 24. september 2019.“

segir Björn Leví og birtir langan mætingalista þar sem sjá má hversu margar mínútur nú eða klukkutíma, viðkomandi þingmaður lét bíða eftir sér. Sjálfur hefur Björn Leví mætt tvisvar of seint.

Mætti alls 20 sinnum of seint

Rósa Björk Brynjólfsdóttir hefur mætt oftast allra of seint, eða í alls 20 skipti, en hún er þingmaður VG.

Ekki er ávallt að ræða um hið sígilda akademíska kortér, sem þykir sum staðar vera mörkin á milli þess sem telst ásættanlegt og þess sem þykir vera allt of seint.

Rósa mætir í 11 skipti of seint en innan við 15 mínútum frá því að fundur hefst. Það lengsta sem Rósa lét bíða eftir sér voru tveir klukkutímar og 20 mínútur.

Formenn litlu betri

Af þeim formönnum flokka sem eiga sæti í nefndum og hafa mætt seint má nefna:

• Logi Einarsson, Samfylking, fimm sinnum mætt of seint.
• Þorgerður Katrín Gunnarsdóttir, Viðreisn, sjö sinnum of seint.
• Inga Sæland, Flokkur fólksins, fjórum sinnum of seint.
• Sigmundur Davíð Gunnlaugsson, Miðflokkur, fimm sinnum of seint.
• Smári McCarthy hefur mætt fjórum sinnum of seint

Mestu skussarnir

Þingmenn sem hljóta að flokkast með króníska óstundvísi og mætt hafa 10 sinnum eða oftar of seint eru :

• Jón Þór Ólafsson, Pírötum hefur mætt 13 sinnum of seint.
• Bryndís Haraldsdóttir, Sjálfstæðisflokkur, 13 sinnum of seint.
• Birgir Ármannsson, Sjálfstæðisflokkur, hefur mætt 12 sinnum of seint.
• Guðmundur Andri Thorsson, Samfylkingu, hefur mætt 11 sinnum of seint.
• Vilhjálmur Árnason, Sjálfstæðisflokkur, 12 sinnum of seint.
• Þorsteinn Víglundsson, Viðreisn, 10 sinnum of seint.

Þeir sem kunna á klukku

Vert er að nefna þá sem aldrei hafa mætt of seint einnig. Þeir eru:

Helga Vala Helgadóttir, Samfylkingu, Bergþór Ólason, Miðflokki, Áslaug Arna Sigurbjörnsdóttir, Sjálfstæðisflokki, Guðjón S. Brjánsson, Samfylkingu og Willum Þór Þórsson, Framsóknarflokki.

Listinn er eftirfarandi: