Líkt og Eyjan greindi frá í morgun fundaði Svandís Svavarsdóttir heilbrigðisráðherra með læknaráði í gær þar sem hún skammaði lækna fyrir að tala niður Landspítalann með gífuryrðum þar sem neyðarástandi væri lýst.
Sjá nánar: Ragnar segir Svandísi hafa hraunað yfir lækna á hitafundi:„Gegn læknaeiðnum að segja ekki frá“
Sagði hún ábyrgð læknaráðs mikla og taldi að orðræðan gæti fælt frá ungt fólk sem ætlaði sér að vinna á Landspítalanum.
Þá sagði hún einnig að erfitt væri að standa með spítalanum þegar harðorðar ályktanir kæmu á færibandi frá læknum. Hefur formaður sjtórnar Læknaráðs, Ebba Margrét Magnúsdóttir, sagst hissa og hugsi yfir viðbrögðum ráðherra, og sagðist skynja pirring hjá Svandísi í garð þeirra sem hefðu gefið út slíkar ályktanir.
Helga Vala Helgadóttir, þingmaður Samfylkingarinnar, segir þetta viðhorf Svandísar vera alvarlegt mál:
„Mér finnst mjög alvarlegt mál að heilbrigðisráðherra segi það „áskorun að standa með Landspítala“ þegar starfsfólk spítalans, læknar, hjúkrunarfræðingar og aðrir lýsa raunveruleikanum innan spítalans. Mér finnst mjög alvarlegt að heilbrigðisráðherra með þessum orðum sínum láti eins og þjóðarsjúkrahúsið sé eitthvað gæluverkefni lækna?“
Helga segir að Svandís hafi í raun verið að hóta læknum:
„Ástandinu hefur verið lýst sem hættuástandi og starfsfólkið sinnir störfum sínum langt umfram bestu getu að mínu mati. Það að hún leyfi sér að hóta starfsfólkinu með þessum hætti veldur mér gríðarlegum vonbrigðum og ég óttast það að ríkisstjórnin ætli sér ekki að bregðast við því neyðarástandi sem er þarna. „Við erum bara einu rútuslysi frá algjörri katastrófu“ var sagt í mín eyru af starfsmanni spítalans í morgun. Ég trúi þeim, enda hef ég orðið vitni að þessu af eigin raun.“
Illugi Jökulsson, fjölmiðlamaður, segist hafa misst allt álit á Svandísi eftir viðbrögð hennar:
„Nú langar mig mest að fara að grenja. Svandís Svavarsdóttir heilsbrigðisráðherra VG segir að það sé „áskorun fyrir SIG“ að „standa með Landspítalanum“ vegna þess að læknar og annað starfsfólk er duglegt að vekja athygli á hörmulegum aðstæðum þar og aðbúnaði. Sú var tíðin að ég kaus VG af því mér fannst Svandís Svavarsdóttir bera af öðrum stjórnmálamönnum. Núna er hún horfin inn í völundarhús hrokans þar sem staða hennar sjálfrar sem ráðherra skiptir jafn miklu eða meira máli en neyðin í heilbrigðiskerfinu,“
segir Illugi og spyr hvaða árangri Svandís hafi náð:
„Æ síðan hún tók við starfinu (sem hún þiggur fyrir mjög góð laun frá mér og öðrum skjólstæðingum LHÍ) þá hefur hver VG-maður japlað eftir öðrum að það sé til vinnandi að vera í þessari ríkisstjórn af því „Svandís sé að standa sig svo vel“. Jahérna hér. Í hverju er sá góði árangur fólginn? Nei, ég held ég setjist bara niður við strætóstöð neyðarmóttökunnar og grenji.“
