Borgarstjórnarmeirihlutinn í Reykjavík samþykkti á fundi borgarstjórnar í gærkvöldi að ábyrgjast 990 milljóna króna lán til Sorpu. Kemur það til vegna mistaka í áætlunum og skráningu, en það þurfti að breyta fjárfestingaráætlun Sorpu bs. um rúmlega 1.3 milljarða króna í sumar, þar sem kostnaður fór fram úr áætlunum vegna gas- og jarðgerðarstöðvar í Álfsnesi, sem nemur 637 milljónum og var kostnaður vegna nýs tækjabúnaðar að andvirði 719 milljón króna ekki færður inn í fjárfestingaráætlun fyrir árið 2019.

Málið þarfnist úttektar

Eyþór Arnalds, oddviti Sjálfstæðismanna í Reykjavík, kaus gegn tillögunni og undrar sig á vinnubrögðunum:

„Við teljum rétt að það fari fram úttekt á þessu málið áður en farið er að veðsetja skatttekjur borgarinnar. Borgin gengst í ábyrgð með þessu fyrir nýjum lánum en það liggja ekki fyrir skýringar á því hvers vegna þetta gerðist. Við sáum að Seltjarnarnesbær gerði líka svipaðan fyrirvara og vildi ekki fara í þessa ábyrgð. Þetta er ekki í fyrsta sinn sem framúrkeyrsluverkefni verða hjá borginni. Við sáum Braggann, svo sáum við Félagsbústaði og svo sjáum við núna Sorpu,“

segir Eyþór við RÚV.

Hann segir málið ekki hafa verið nægilega rannsakað og vill vita hvernig slíkt geti gerst:

„Þetta eru nokkur mistök. Þetta eru ekki ein mistök. Það eru til tölur sem voru ekki færðar í annað skjal. Það er ein skýringin og fleira. En þegar svona margir aðilar koma að, sveitarfélögin og aðrir, og þetta klikkar – líka eftir að önnur verkefni hafa farið fram úr áætlun, þá viljum við bara fá úttekt á því hvernig þetta getur gerst. Þetta á ekki að geta gerst.“

Eyþór gagnrýnir einnig að Reykjavíkurborg, sem eigi 2/3 í Sorpu, skuli aðeins eiga einn fulltrúa í stjórn félagsins:

„Ég held að það þurfi að endurskoða þetta byggðarform. Þetta eru svolítil svört box sem við höfum litla aðkomu að.“