Eftir upphlaupið sem varð í kjölfar þess að Donald Trump Bandaríkjaforseti falaðast eftir að kaupa Grænland, kom upp kvittur þess efnis að hann gæti snúið sér næst að Íslandi. Var þetta til dæmis rætt í einum vinsælasta fréttaskýringaþætti í Bandaríkjunum, Fox &  Friends, þar sem einn þáttastjórnandinn sagðist hafa heyrt að Ísland væri næst, en Fox fréttastöðin hefur náin tengls inn í Hvíta húsið og Repúblikanaflokkinn.

Hvort varaforseti Bandaríkjanna, Mike Pence, muni taka upp formlegar viðræður um kaup á Íslandi þegar hann kemur hingað til lands skal ósagt látið, enda alls óvíst ennþá hvort hann muni hitta Katrínu Jakobsdóttur, forsætisráðherra, sem verður erlendis í öðrum erindagjörðum. Hún gæti hinsvegar hitt Pence ef varaforsetinn kýs að framlengja dvöl sína.

Eyjan sendi fyrirspurn á forsætisráðuneytið með ósk um svör frá Katrínu, um hvort Ísland væri til sölu, hvert kaupverðið yrði ef svo væri og hvort stjórnvöld hefðu svör á reiðum höndum ef tilboð bærist.

Svarið sem barst var stutt og laggott:

„Ísland er ekki til sölu.“

Var það skrifstofustjórinn Ágúst Geir Ágústsson sem tók að sér að svara fyrir hönd Katrínar Jakobsdóttur.

Hvað með Kína ?

Utanríkisráðuneytið er enn með til skoðunar hvort ganga eigi að risatilboði frá Kína, sem felur í sér stóra peningagjöf til uppbyggingar á innviðum hér á landi. Um risavaxið verkefni er að ræða sem nefnist Belti & braut. Fullyrt er af ýmsum að stórveldið sé að kaupa sig til áhrifa og auka umsvif sín um heim allan með þessu og hafa Bandarísk stjórnvöld tekið undir þá gagnrýni.

Kínverjar segja ekkert hanga á spýtunni, heldur sé um að ræða „frábært tækifæri til sameiginlegrar framþróunar,“ svo vitnað sé í sendiherra Kína hér á landi.

Sjá nánar: Íslensk stjórnvöld íhuga risastóra peningagjöf frá Kína – Marshallaðstoðin bliknar í samanburði

Sjá einnig: „Íslenska ríkisstjórnin er opin fyrir að undirrita samkomulag við Kína“