Seinustu misseri hafa Ólafur Stephensen, framkvæmdastjóri Félags atvinnurekanda og Sigmar Vilhjálmsson talsmaður FESK, Félags eggja-, svína- og kjúklingabænda átt í opinberum deilum varðandi innflutning á kjöti.
Báðir ásökuðu þeir hvorn annan um að skauta framhjá staðreyndum og segja andmælanda sinn ekki haf kynnt sér málið nægilega vel. Nú hefur Ólafur Arnarsson, fyrrverandi formaður Neytendasamtakanna bæst í rifrildið, en hann gagnrýnir Sigmar harðlega í skoðanapistli sem birtist í Fréttablaðinu.
„Honum finnst skrítið að verið sé að flytja inn vörur í „sama gæðaflokki“ og við Íslendingar getum framleitt sjálfir. Hver metur þessi gæði? Á að setja á fót Gæðaráð ríkisins sem ákveður hvað má flytja inn og hvað ekki? Á að banna allan innflutning á Parma-skinku ef Ali býður upp á vöru með sama nafni? Er þetta örugglega sama varan? Er ekki betra að láta neytendur um að meta gæði vörunnar?“
Ólafur skýtur fast á Sigmar þegar hann segir félagsmenn FESK vera þá sem „níðast“ á íslenskum neytendum.
„Þá sakar Sigmar innflytjendur um að hirða sjálfir allan ábata af tollfrjálsum innflutningi matvæla í stað þess að láta ábatann renna til neytenda. Innflytjendur flytji inn lélega vöru og það sé innanlandsframleiðslan sem haldi uppi gæðum á matvælum. Hann segir innflytjendur ávaxta kaupa annars flokks vöru og selja á fyrsta flokks verði því ávextir séu ekki framleiddir hér á landi.“
„En hverjir níðast svona á íslenskum neytendum? Jú, í ljós kemur að félagsmenn í FESK flytja inn tæp 90 prósent tollkvótans af svínakjöti og helming kvótans af alifuglakjöti. Það eru sem sagt hans eigin félagsmenn sem níðast á neytendum.“
„Og hverjir flytja inn ávextina? Einn stærsti innflytjandinn er Mata, systurfélag kjúklingaframleiðandans Matfugls og svínakjötsframleiðandans Síldar og Fisks (Ali) og aðili að FESK. Mata fær kaldar kveðjur frá eigin talsmanni.“
Ólafur vill líka fá svör við því hversvegna FESK hafi ekki látið neytendur njóta endurgreiðslna á ólöglegum gjöldum sem félagið fékk um árið.
„Í framhaldi af þessu væri líka áhugavert að fá svör við því hvers vegna fyrirtæki innan FESK hafa ekki látið neytendur njóta endurgreiðslna frá ríkinu á ólögmætum gjöldum sem innheimt voru vegna útboða á tollkvótum á árunum 2009-2013. Í kjölfar niðurstöðu Hæstaréttar um að gjaldtaka vegna útboða tollkvóta væri ólögleg endurgreiddi ríkið innflytjendum næstum 800 milljónir árið 2016. Drjúgur hluti þeirrar fjárhæðar rann til fyrirtækja innan FESK. Í hvaða vasa fóru þeir peningar? Ekki til neytenda, svo mikið er víst.“
