Skipun nýs seðlabankastjóra hefur farið fyrir brjóstið á þeim sem hallast þykja til vinstri í stjórnmálum, ef marka má viðbrögðin síðustu daga. Björn Leví Gunnarsson, þingmaður Pírata, segir Ásgeir Jónsson þurfa að gera upp fortíð sína, þangað til njóti hann ekki trausts, sem hljóti að vera markmið með skipun hans. Gunnar Smári Egilsson, sósíalistaforingi, segir Ásgeir fulltrúa nýfrjálshyggjunnar, sem hafi sannast að væri gölluð og úrelt stefna í hruninu.
Þá hefur Ásgeir fengið heldur kuldalegar móttökur frá forystu verkalýðshreyfingarinnar, helst Sólveigu Önnu Jónsdóttur, formanns Eflingar, sem taldi skipun Ásgeirs vera „hörmulegar fréttir.“
Staksteinahöfundur Morgunblaðsins virðist þó á öðru máli. Hann eyðir meirihluta dálksentimetra sinna í að telja upp gallana í ráðningaferlinu, en kemst síðan að þeirri niðurstöðu að hið meingallaða ferli hafi þrátt fyrir allt ekki komið að sök.
Staksteinahöfundur telur að hæfisnefndir taki völdin af stjórnmálamönnum í of miklum mæli þessi dægrin:
„Nú liggur fyrir ákvörðun um nýjan seðlabankastjóra. Seðlabankastjóraskipti voru miklu meira en tímabær en aðdragandi þeirra nú er umhugsunarverður líkt og yfirleitt þegar skipað er í nýjar stöður hjá hinu opinbera um þessar mundir. Orðið er brýnt fyrir stjórnmálamenn að endurmeta rækilega þær aðferðir sem notaðar eru og felast í því að skipa einhvers konar valnefndir sem í raun stilla ráðherrum upp við vegg og taka af þeim völdin,“
segir pistlahöfundur og nefnir að það hafi aldrei hafa verið ætlunin með slíkum nefndum, þó svo það hafi orðið raunin á endanum:
„Nefndir af þessu tagi eru ábyrgðarlausar og ættu aðeins að vera ráðherra til aðstoðar, en hafa þróast út í að sölsa til sín skipunarvaldið, eða þrengja að minnsta kosti að ráðherra með óeðlilegum hætti. Þetta sést ítrekað þegar skipað er í dómarastöður en er engu betra þegar skipað er í stöðu seðlabankastjóra. Slík ákvörðun á ekki að vera ábyrgðarlausrar nefndar sem raðar upp sínum óskakandidötum, heldur ráðherra sem ber ábyrgð og stendur reglulega frammi fyrir kjósendum.“
Að lokum segir Staksteinahöfundur að þrátt fyrir allt þetta gallaða ferli, þar sem ábyrgðalaus nefnd raðaði upp óska-umsækjendum sínum, og stillti ráðherra upp við vegg, hafi það ekki reynst svo illa eftir allt saman, því ekki sé hægt að gagnrýna Ásgeir:
„Þetta gallaða ferli og vafasöm vinna valnefndar verður þó ekki til þess að ástæða sé til að gagnrýna þann sem nú hefur verið skipaður. Hann hefur sýnt ágætan skilning á efnahagsmálum og honum fylgja allar góðar óskir í nýju og vandasömu starfi.“
Þess má geta að Davíð Oddsson, ritstjóri Morgunblaðsins, er fyrrverandi seðlabankastjóri og ætti því að vita hvaða hæfniskröfur eru nauðsynlegar í starfið, en þess ber að geta að Davíð skrifar Staksteina sjaldnar en margur heldur og er alls ekkert víst að hann haldi um penna í dag. Davíð var gagnrýninn á yfirstjórn Kaupþings banka (Arion) í aðdraganda hrunsins og eftir, en Ásgeir starfaði þar um árabil, sem er ein helsta ástæða þeirrar gagnrýni sem Ásgeir hefur fengið eftir að greint var frá skipun hans.
