Gunnar Smári Egilsson, stofnandi Sósíalistaflokks Íslands og þar með svarinn óvinur frjálshyggjunnar, setti í dag fram kenningu um hver stæði að baki nýlegum skrifum á Vefþjóðviljann, eða Andríki, en það er miðill sem er „ætlað að kynna frjálslyndar stjórnmálahugmyndir með útgáfu og öðru starfi,“  líkt og segir á heimasíðu.

Gunnar Smári telur að þingmaður Sjálfstæðisflokksins, Sigríður Á. Andersen, sem sagði af sér embætti dómsmálaráðherra fyrir um tveimur mánuðum síðan, hafi ekki setið með hendur í skauti sér á meðan, heldur hafi hún tekið til við nafnlaus greinaskrif á netinu:

„Í gær datt inn klausa á Vefþjóðviljann, andriki.is, í fyrsta sinn síðan í fyrra þegar ritið birti tvær greinar, en vefurinn hefur að mestu leyti legið niðri frá því að Sigríður Á. Andersen varð dómsmálaráðherra snemma árs 2017. Það ár birtust fáeinar greinar miðað við árin á undan, fyrst og fremst í smá gusu fyrir kosningarnar í október eftir að ríkisstjórn Bjarna Ben hafði fallið vegna embættisverka Sigríðar. Það er vitað að þótt nokkur hópur hafi staðið að Vefþjóðviljanum þegar hann var settur upp 1995 þá var Sigríður ötulasti penninn á vefnum þau tuttugu ár, frá 1997 til janúar 2017, sem birtir voru daglegir pistlar á vefnum. Ástæða þess að hætt var að birta daglega pistla var að Sigríður var orðin ráðherra. Nú þegar hún hefur sagt af sér má reikna með að hún noti Vefþjóðviljann til að byggja aftur upp pólitíska stöðu innan Sjálfstæðisflokksins. Morgunblaðið lyftir hatti sínum fyrir Sigríði og birti klausuna frá í gær í Staksteinum dagsins.“

Játar hvorki né neitar

Þetta er athyglisverð kenning hjá Gunnari Smára og bar Eyjan hana undir Hörð H. Helgason, einn þeirra þriggja sem fara með ritstjórn vefs Andríkis.

Hörður vildi ekkert gefa upp um hvort Sigríður hefði skrifað fyrir miðilinn:

„Ég hef bara aldrei nokkurn tíma í áratugalangri sögu þessa fjölmiðils verið að uppljóstra hverjir eru að skrifa fyrir okkur hverju sinni og ætla ekki að fara að byrja á því núna. En það er alltaf gaman að sjá nýja lesendur bætast í hópinn, eða gamla og trygga, eftir því sem við á í þessu tilfelli,“

sagði Hörður.