Borgarfulltrúi Sósíalistaflokks Íslands, Sanna Magdalena Mörtudóttir, er ósátt við viðbrögð stjórn knattspyrnudeildar Hauka í Hafnarfirði vegna rasískra ummæla Björgvins Stefánssonar, knattspyrnumanns hjá KR, þegar hann lýsti leik Hauka og Þróttar R. í fyrstu deild karla í gærkvöldi.
Björgvin sagði:
„Þetta er það sem ég er alltaf að segja. Það er svo stutt í villimannseðlið hjá svarta manninum,“
þegar upp úr sauð milli liðsmanns Hauka og Archange Nkumu hjá Þrótti, sem er dökkur á hörund.
Björgvin, sem er fyrrverandi leikmaður Hauka, baðst strax afsökunar á ummælum sínum eftir leikinn og segir Sanna að það sé alltaf gott þegar fólk sjái að sér, allir geti klúðrað málunum, en dregur einlægni Björgvins í efa:
„Svona orðanotkun myndast þó ekki í tómarúmi og ég á erfitt með að sjá hvernig ummælin „Þetta er það sem ég er alltaf að segja, það er svo stutt í villimannseðlið hjá svarta manninum“ byggir á hugsunarleysi. Er ég þá að skilja rétt að maður þurfi fyrst að hugsa hvort að þessi orð séu viðeigandi áður en maður lætur þau falla? Ég hélt það væri frekar borðliggjandi að svona hluti segði maður ekki. Þegar þetta er eitthvað sem kemur út úr munni einstaklings þegar hann lýsir fótboltaleik, endurspeglar það þá ekki hvernig sumir vegna forréttindastöðu sinnar þurfa ekki að hugsa og segja bara það sem þeim dettur í hug?“
Sanna segir að skoða þurfi rót vandans og kallar eftir því að stjórn knattspyrnudeildar Hauka gangi lengra í yfirlýsingu sinni á Twitter, þar sem ummæli Björgvins eru hörmuð:
„Það væri frábært ef að fólk sem segir svona hluti og sér eftir þeim myndi ganga skrefinu lengra og skoða rót vandans, ef það væri til í að kynna sér birtingarmyndir kynþáttafordóma og hvernig það geti lagt sitt á vogarskálarnar til að vinna gegn kynþáttafordómum. Það væri líka frábært ef að stjórn knattspyrnudeildar Hauka myndi ganga skrefinu lengra í yfirlýsingu sinni og segja að auki við að harma þessi ummæli, muni þau gera allt sem í sínu valdi stendur til þess að tryggja að svona eigi sér ekki stað aftur, með því til dæmis að sporna gegn kynþáttafordómum á öllum sviðum sem það geti. Ég er bara búin að lesa þessa frétt eftir að hún var uppfærð í ljósi yfirlýsingar knattspyrnufélagsins og veit því ekki hvort að umræddir aðilar hafi tjáð sig frekar um þessi mál á öðrum vettvangi.“
Sjá einnig: Björgvin með kynþáttaníð í beinni útsendingu:Þetta sagði hann um þeldökkan leikmann
Sjá einnig: KSÍ safnar gögnum eftir rasísk ummæli Björgvins:Líkur á að honum verði refsað
Afsökunarbeiðni Hauka:
Stjórn knattspyrnudeildar Hauka harmar ummæli Björgvins@Fotboltinet pic.twitter.com/5qsH39lRKx
— Haukar Fótbolti (@FCHaukar) May 23, 2019
