„Ég nota nú orð sem allir skilja og þar á meðal siðanefnd: Nú er rökstuddur grunur um það að Ásmundur Friðriksson hafi dregið að sér fé, almannafé, og við erum ekki að sjá viðbrögð þess efnis að verið sé að setja á fót rannsókn á þeim efnum. Ég segi þessi orð með fullri vitneskju um að þau hafi verið dæmd sem brot á siðareglum þingmanna. Við vitum það hins vegar öll hérna inni, að þau eru sönn. Fyrir því liggur játning og staðfesting í frávísun forsætisnefndar. Þess vegna er þetta rökstuddur grunur í allri merkingu þeirra orða. Ef við getum gerst brotleg við siðareglur fyrir að segja sannleikann, þá er voðinn vís,“ “
sagði Björn Leví Gunnarsson, þingmaður Pírata í ræðu sinni á Alþingi í dag. Mbl.is greinir frá.
Endurtók hann þar með sömu orð og siðanefnd taldi brjóta gegn siðareglum Alþingismanna, þegar Þórhildur Sunna Ævarsdóttir hafði þau um Ásmund Friðriksson í Silfrinu á síðasta ári.
Forseti Alþingis, Steingrímur J. Sigfússon, taldi orð Björns Leví vera ósæmileg.
Orðanotkun Björns Leví er því augljósleg ögrun við forsætisnefnd Alþingis, sem hlýtur að vísa málinu til Siðanefndar Alþingis, líkt og í máli Þórhildar Sunnu. Björn Leví hefur áður kallað Ásmund þjóf, en það þótti ekki nægileg ástæða fyrir forsætisnefnd til að vísa málinu áfram til Siðanefndar, ekki frekar en máli Ágústs Ólafs Ágústssonar, þingmanns Samfylkingarinnar, eða Klaustursþingmanna, en allir þessir brutu augljóslega gegn siðareglum Alþingismanna.
Björn Leví sagði einnig:
„Forseti, mig langar því að vera eins skýrmæltur og ég get vegna álits forsætisnefndar þegar erindi mínu um endurgreiðslur vegna aksturskostnaðar var vísað frá þar sem kom fram að Ásmundur Friðriksson hafði vissulega fengið endurgreiðslu frá Alþingi vegna þáttagerðar fyrir ÍNN. Að hann hafði fengið endurgreiðslur fyrir notkun á eigin bíl þrátt fyrir að það var gegn reglum um slíkar endurgreiðslur og vegna þess að Ásmundur játaði að hafa fengið endurgreiðslur vegna prófkjörsbaráttu í eigin flokki sem er klárlega ekki hluti af starfi hans sem þingmanns.“
Birgir Ármannsson, þingflokksformaður Sjálfstæðisflokksins, sagði ummæli Björns Leví vera vítaverð og gera lítið úr málsmeðferð siðanefndar:
„Ég tel nú að ummælin hafi nú stappað nærri að vera vítaverð eins og þingsköp kveða á um. Ekki eingöngu vegna þess að í þeim fólst endurtekning á aðdróttunum og ærumeiðingum í garð háttvirts þingmanns, Ásmundar Friðrikssonar. Heldur líka vegna þess að það er auðvitað verið að gera lítið úr þeirri málsmeðferð sem átt hefur sér stað hér á vegum þingsins, bæði af hálfu háttvirtrar forsætisnefndar og siðanefndar og ég verð að segja að mér finnst afar sérkennilegt að háttvirtur þingmaður Pírata, Björn Leví Gunnarsson, gangi fram með þeim hætti í ljósi allrar forsögu málsins og hvað það hefur fengið mikla umfjöllun og hvernig þessum ásökunum hans og fleiri hefur verið svarað.“
Uppfært –
Getur ekki kvartað undan einelti
Björn Leví skrifaði færslu á Facebook í kjölfar ræðu sinnar á Alþingi:
„Þingmaður sem segist fá endurgreiðslu vegna prófkjörsbaráttu í eigin flokki, vegna þáttagerðar fyrir sjónvarp eða vegna notkun á eigin bíl sem er andstætt reglum getur ekki kvartað undan einelti þegar spurt er hvort ekki eigi að rannsaka málið betur. Það er skrumskæling á því hvað einelti er.
Málið hefur ekki verið rannsakað. Forsætisnefnd hefur vísað erindi um rannsókn frá þar sem fram kom viðurkenning á þeim brotum sem þingmaðurinn hafði sjálfur greint frá. Ég hlýt því að endurtaka spurningu mína um rannsókn, nú með orðum sem allir skilja.
Út af því hvernig þetta mál ber að, með játningu um vafasamar endurgreiðslur þá hef ég ekkert að afsaka. Hvorki nú eða ef rannsókn leiðir ekki til sakfellingar. Tilefnið um rannsóknarbeiðni er óvéfengjanlegt. Hvort það takist að sanna eða afsanna er annað mál og hvort sem niðurstaðan var sekt eða sakleysi þá er alltaf rétt að biðja um rannsókn við þessar aðstæður.“
