Endursmíði glugga á gaflvegg braggans við Nauthólsveg 100 kostaði rúmar 1.2 milljónir króna. Þetta kemur í ljós í svari Reykjavíkurborgar við fyrirspurn Kolbrúnar Baldursdóttur, oddvita Flokks fólksins, um hvað hafi verið gert fyrir þær 70 milljónir sem úthlutað var til minjaverndar vegna braggans. Verkfræðistofan Efla tók saman skýrsluna.

Um er að ræða „endursmíði með upprunalegu útliti og frágangi“ samkvæmt svari Reykjavíkurborgar. Í svarinu er tilgreint að aðrir sérsmíðaðir gluggar (fjöldi glugga kemur ekki fram) hafi kostað alls rúmar 1.7 milljónir króna, en þeir voru einnig sérsmíðaðir með eldra útliti.

Ekki koma fram skýringar á því hvernig einn gluggi kosti hátt í það sem hinir gluggarnir kosta til samans.

Kostnaðarsöm sérfræðiráðgjöf

Heildarkostnaður vegna sérfræðiráðgjafar var alls 22,4 milljónir. Kostnaður við eftirlit arkitekta á staðnum var tæpar þrjár milljónir króna. Í skýringum vegna þess kostnaðarliðar segir:

„Ofantaldir verkliðir kalla á mun meira eftirlit en í hefðbundnu verki þar sem ekki er hægt að teikna allt upp, margt sem þarf að ræða og ákveða á verkstað.“

Sama skýring er notuð orðrétt vegna verkfræðieftirlits með framkvæmd, sem kostaði tæpa 2.5 milljón.

Verkfræðihönnun kostaði alls 8.1 milljón. Í skýringu á kostnaði segir:

„Gera má ráð fyrir að kostnaður við verkfræðiráðgjöf hafi verið um 20- 30% umfangsmeiri en í hefðbundinni nýbyggingu vegna ofangreindra verka. Óvenju mikill fjöldi sérteikninga miðað við umfang verks.“

Sjokkerandi staðfesting

Kolbrún gagnrýnir í bókun sinni að margir virðist hafa „komist í feitt“ í braggamálinu og að opnað hafi verið fyrir „peningakrana“:

„Það var annasamur borgarráðsfundur í morgun. Flokkur Folksins lagði fram 4 nýjar tillögur, 4 fyrirspurnir og 7 bókanir. Við fengum svar við fyrirspurn um skilgreindar minjar vegna Nauthólsvegs 100 og í því svar er sjokkerandi staðfesting á hvað þarna var í gangi sem dæmi kostaði einn gluggi 1.25 mkr. Bókun í málinu fylgir hér með:

Þessi svör bera með sér enn frekari staðfestingu að í þessari framkvæmd, Nauthólsvegur 100 var opnað fyrir peningakrana. Margir sem þarna komu að hafi heldur betur „komist í feitt“ eins og það er stundum orðað. Hvert sérstakt viðvik/verk kostaði mikið, sem dæmi kostaði einn gluggi á gaflvegg kr. 1.25 milljónir Vá! (endursmíði, en gamli glugginn var til og er fyrirmynd. Ekki þarf því að teikna, bara smíða). Margt hefði átt að vera vitað fyrirfram t.d. að niðurrif yrði viðkvæmt. Hér er glefsa úr svarinu sem segir mikið „Efni sett til hliðar, geymt til síðari nota sem síðan reyndist ekki hægt“ er dæmi um vitleysisganginn. Gaflveggur er gerður upp í stað endursteypunnar kemur fram á einum stað og enn aftur síðar „smíðaðar voru stálstyrkingar til styrkingar á gömlum rústum, allir veggir voru ójárnbundnir og vandasamt að koma þessu á húsið“. Af hverju voru ekki steyptir nýir veggir? Að styrkja með stáli er eins mikil sögufölsum og að steypa að nýju. Þessi atriði sem varða gaflveggina kostuðu rúmlega 7 milljónir. Einn liður í svarinu er: Gamlir stálbogar endurnýttir. Segir þar að hluti stálboga var endurnýttur sem stöllun á lóð, hreinsaðir og styrktir. Þetta eitt kostaði 1.8 milljónir. Þarna er verið að leika sér með fé borgarbúa eins og engin sé morgundagurinn. Þetta er hneyksli og slæmt að frá þessu ganga ábyrgðaraðilar eins og ekkert sé.“