Íslenska flugmannafélagið (ÍFF), sem er stéttarfélag flugmanna WOW air, mun ekki geta greitt þeim nein laun í kjölfar gjaldþrots félagsins. Þetta staðfestir Vignir Örn Guðnason, formaður ÍFF, við Eyjuna í dag:

„Nei, staðan er sú að við erum pínkulítið stéttarfélag, erum ekki í ASÍ og höfum ekki bolmagn til þess að greiða laun flugmanna,“

segir Vignir en 178 fyrrverandi flugmenn sem misstu vinnuna hjá WOW eru skráðir í félagið sem tók til starfa síðla árs 2014.

VR hefur boðist til að greiða laun félagsmanna sinna sem störfuðu hjá WOW, en þeir eru um 250 talsins. Mun VR gera kröfu í þrotabú WOW, en fáist ekkert þar tryggir Ábyrgðasjóður launa greiðslur að hámarki 633 þúsund krónur á mánuði.

Vignir segir í forgangi aðstoða flugmenn í að verða sér út um vinnu:

„Við erum að meta næstu skref og sjá hvað við getum gert, það er í forgangi að aðstoða flugmenn í að verða sér út um vinnu. En við höfum ekki þessa sjóði sem stóru stéttarfélögin hafa.“

Vignir segist ekki vita hvernig flugmönnum hefur vegnað í atvinnuleit sinni, en að ÍFF muni bjóða fram aðstoð sína. Hann ber lof á flugmenn WOW, en segir það mýtu að íslenskir flugmenn séu eftirsóttari en aðrir í bransanum:

„Ég held að það sé bara mýta, íslenskir eru fínir flugmenn og allt það, en jafn misjafnir eins og aðrir auðvitað. En ég get fullyrt að flugmenn WOW eru allir frábærir flugmenn, hvort sem þeir eru íslenskir sem erlendir. Þeir fljúga vinsælli flugvélategund sem getur flogið, ekki að ég sé að bauna á kollega mína hinum megin,“

segir Vignir.

Hann segir stéttarfélagið ekki hafa beina milligöngu um atvinnu, þó svo öll aðstoð sé í boði og viti því ekki hvort eitthvert af þeim fjölda flugfélaga sem hingað fljúgi hafi borið víurnar í flugmenn WOW:

„Það er eitthvað lítið sem við höfum heyrt af því, kaupin á eyrinni ganga ekki svoleiðis fyrir sig. Menn eru að setja sig í samband við ráðningastofur, eða beint við flugfélögin. Við höfum ekki heyrt neitt af neinu, en það er helst Wizz air sem einhver von er í.“