„Formannsskipti verða í Sjálfstæðisflokknum. Bjarni hættir í haust og Jón Gunnarsson verður nýr formaður. Hann mun breyta flokknum í björgunarsveit og á endanum sameinast Landsbjörgu.“
Þetta segir í völvuspá Brynjars Níelssonar, þingmann Sjálfstæðisflokksins, en hann skrifar áramótakveðju á Facebook-síðu sína og fullyrðir í léttum dúr að völva sín hafi reynst sannspá í gegnum tíðina. „Hún spáði því meðal annars að margar fjölskyldur myndu lenda í fjárhagserfiðleikum eftir að bankarnir hrundu 2008,“ segir hann.
„Þegar fjölmiðlafrumvarpið verður samþykkt með atkvæðum stjórnarandstöðunnar mun Óli Björn hætta á þingi og flytja aftur á Sauðárkrók og taka við bakaríi afa síns. Njáll Trausti hættir einnig á þingi og tekur við umsjón með flugvöllum NATO í Asíu. Guðlaugur Þór fer í heimsókn til Namibíu í sumar en kemur ekki til baka.“
Brynjar segir Miðflokkinn og Framsókn eigi eftir að sameinast á árinu, að Bergþór Ólason taki við af Þórhildi Sunnu sem formaður laganefndar Evrópuráðsins. „VG mun friðlýsa allt Ísland og flokkinn um leið. Inga Sæland mun ná á árinu að halda sömu ræðuna í þúsundasta skipti, sem mun vera met. Logi hættir sem formaður Samfylkingarinnar eftir sigur í þættinum Allir geta dansað,“ segir hann.
„Samfylkingin og Píratar munu setja á laggirnar stjórnmálaskóla með sérstaka áherslu á fágun og góða siði. Björn Leví og Helgi Hrafn verða með námskeið í því hvernig á að tala í löngu máli um ekki neitt. Skólastjórinn, Þórhildur Sunna, mun fara í saumana á Freka Karlinum og hvernig hann breyttist í konu á örskömmum tíma. Halldóra Mogensen verður með fyrirlestraröð um hvernig losna eigi við þennan vonda hagvöxt og auka útgjöld til velferðarmála um leið. Fyrirlestraröðin ber yfirskriftina „Hvernig búa eigi í hliðarveruleika“. Þá munu Helga Vala og Þórhildur Sunna kenna saman námskeið um heiðarleika og gott siðferði í stjórnmálum.“