Björn Bjarnason, fyrrverandi dómsmálaráðherra, fjallar um kreppu jafnaðarmennskunnar í pistli sínum í dag. Fer hann yfir útreið breska Verkamannaflokksins á dögunum, sem var sú versta í 80 ár og nefnir einnig að jafnaðarmannaflokkar í Þýskalandi og á Norðurlöndunum séu í tilvistarvanda, jafnvel þótt þeir séu í ríkisstjórn.

Þá nefnir Björn að Sjálfstæðisflokkurinn gegni mikilvægu hlutverki í tilurð jafnaðarmanna:

„Hér á landi er óvild í garð Sjálfstæðisflokksins sameiningartákn þeirra sem berjast fyrir vinstrimennsku. Má segja að þetta hafi sterkan svip á íslensk stjórnmál í um 20 ár eða frá því að Samfylkingin var stofnuð árið 2000,“

segir Björn og heldur áfram:

„Línur í þessu efni skýrðust fyrir þingkosningarnar 2003 þegar Samfylkingin skipaði sér með Baugsmönnum og Fréttablaðinu í von um að bola Sjálfstæðisflokknum úr ríkisstjórn. Að flokki sé haldið á floti með rógi og dylgjum um að andstæðingur hans eigi hlut að öllu sem miður fer eitrar pólitískt andrúmsloft og þjónar aðeins þeim tilgangi að beina athygli frá gjaldþroti eigin stefnu. Þetta er réttnefnd pólitísk spilling.“