Björgólfur Jóhannsson, starfandi forstjóri Samherja, segist hafa spurt Þorstein Má hvort hann hafi tekið þátt í mútugreiðslum. Þetta kom fram í hádegisfréttum RÚV. Var Björgólfur spurður af fréttamanni hvort hann hefði spurt Þorstein út í þetta, sem svaraði því játandi.

Aðspurður hvernig Þorsteinn Már hefði svarað honum, sagði Björgólfur að Þorsteinn hefði svarað því neitandi.

Björgólfur sagði jafnframt að tilgangslaust væri að spyrja frekar út í málið og hvort greiddar hefðu verið mútur af Samherja, meðan rannsókn færi fram:

„Það hefur engan tilgang í sjálfu sér að spyrja félagið aftur og aftur þessara spurninga. Þetta er í farvegi og félagið mun fara yfir þetta þegar það liggur fyrir og annað er í svona, ef við værum að svara hluta og hlutum og ekki hlutum að þá væru það svona getgátur að mínu viti.“

Ítrekaði Björgólfur að Samherji hygðist rannsaka málið með aðkomu norskrar lögmannsstofu og fullur vilji væri hjá stjórn Samherja að upplýsa málið og starfa með opinberum aðilum til þess. Hann neitaði því hinsvegar að fyrirtækið væri að rannsaka sjálft sig:

„Fyrirtækið er ekki að rannsaka sig sjálft. Stjórn fyrirtækisins vill fá niðurstöðu í málið.“