Fullvíst má telja að leiðarahöfundur Morgunblaðsins í dag sé Davíð Oddsson. Fjallar hann um stjórnarskrármálið og sparar ekki stóru lýsingarorðin, en greint var frá því í gær að í rökræðukönnun um endurskoðun stjórnarskrárinnar sem haldin var í Laugardalshöll um helgina, hefðu meðlimir í Stjórnarskrárfélaginu verið viðstaddir. Var fréttin á forsíðu Morgunblaðsins og mikið gert úr veru meðlimanna á fundinum og þeir sagðir hafa verið með áróður. Er nærvera þeirra sögð hafa vakið furðu, þar sem um hagsmunaaðila hafi verið að ræða.
Leiðarahöfundur er stórorður um stjórnarskrármálið, sem fyrr:
„Vitleysingaspítalinn taka tvö er kominn á dagskrá. Í gær voru sagðar fréttir af því að stjórnarskrárruglið gengi nú aftur. Og allur var aðdragandinn jafn vitlaus og síðast og jafnvel voru fulltrúar ólögmæta „stjórnlagaráðsins“ hafðir í áhrifastöðum á nýju upphafsfundunum, dreifandi gömlu gögnunum sem gengu aldrei upp og hleypandi upp fundinum, sem er varla gagnrýnisvert. Það stórundarlega er að þegar þessi skrípaleikur, taka tvö, er settur í gang á ný er hann með samþykki og velvilja Sjálfstæðisflokksins! Hvernig gat það gerst?“
Þá nefnir leiðarahöfundur að ríkisstjórn Jóhönnu og Steingríms J. hafi talið að fall bankanna ákjósanlegt tækifæri til að hleypa öllu í bál og brand, á þeirri stundu sem þjóðin hafði meiri þörf á samheldni:
„Bankaáfallið var alþjóðlegt þótt það hefði verið tilfinnanlegra um margt hér en annars staðar. Hvergi annars staðar kom upp sú hugmynd að vegna áfallsins þar þyrfti að breyta stjórnarskrá viðkomandi lands.“
Þá virðist leiðarahöfundur ekki hafa mikið álit á þeirri vinnu sem stjórnlagaráðið kom í verk á sínum tíma:
„Byrjað var á stórskrípaleik í Laugardagshöll þar sem fundarmenn sátu við 100 hringborð með „leiðbeinanda“ við hvert og hugsuðu upp stikkorð um breytingar á stjórnarskrá. Og kraftaverkið gerðist því af öllum borðum í þessu risastóra andaglasi bárust svipuð stikkorð og spekingar létu eins og tilviljanakennd tombóla af þessu tagi væri frábært upphaf á breyttri stjórnarskrá. Og nú er vitleysan farin af stað aftur. Og þar fara fyrir flokkar sem hafa sýnt að þeir telja vilja stjórnarskrárinnar ekki skipta neinu máli, frekar en að ákvarðanir æðstu funda þeirra sjálfra séu marktækar.“
