Íbúar í Grafarvogi eru ósáttir við auglýsingaskilti sem komið hefur verið fyrir við Strandveg. Skiltið er sett upp við göngustíg þar sem gönguþverun er framundan við umferðargötu, en bent hefur verið á að það sé undarleg staðsetning, þegar athygli ökumanna sem og gangandi vegfarenda ætti að beinast að umferðinni.
Í hópnum Íbúar í Grafarvogi á Facebook er sagt að LED rafmagnsskiltin, sem eru afar björt, séu einnig mikil sjónmengun fyrir þá sem eiga hús þarna í kring:
„Er virkilega leyfi fyrir þessu ljósaskilti sem blikkar hérna við náttúruperluna ? Nú er farið að dimma og eina sem sérst út um stofugluggann hjá mér. Eru einhvað hægt að gera í þessu ? Gera undirskriftalista ?“
Þá setur annar auglýsingar af þessu tagi í samhengi við stefnu borgarinnar er varðar gjafir frá fyrirtækjum til skólabarna:
„Þetta skilti er á vegum sömu borgaryfirvalda og banna að börnum séu gefnir t.d. öryggishjálmar eða tannburstar því það gætu talist auglýsingar. Er ekki örugglega búið að tryggja að það fari engin börn þarna framhjá?“
Aðrir spyrja hvaða erindi slík skilti eigi á slíkum stöðum:
„Fara sambærileg skilti út á Ægissíðu og út í Gróttu við gönguleiðir? Þetta er skandall. Þetta er útivistar svæði.“
„Þetta er hryllingur!“
„Ég missti andlitið áðan. Hver gaf leyfi fyrir þessu? Þetta er skelfilegt og gjörsamlega útúr kú í fallegri náttúrunni“
Skiltið er eitt af 40 í höfuðborginni og kvartað hefur verið undan skiltum á öðrum staðsetningum einnig, þó aðallega vegna sjón- og ljósmengunar.
Borgarfulltrúi Sjálfstæðisflokksins, Valgerður Sigurðardóttir, hefur sent inn fyrirspurn til borgarráðs vegna málsins, um fjölda skiltanna, staðsetningu þeirra og hvort þau uppfylli öryggisviðmið og ákvæði er varðar birtustig:
„Það liggur í hlutarins eðli að skiltið skapar mikla hættu, enda er markmiðið að það fangi athygli vegfarenda á ökutækjum. Óskað er eftir upplýsingum um hvar þessi nýju auglýsingaskilti eru staðsett í borgarlandinu og hvort að þessar staðsetningar hafi verið kynntar fyrir íbúum í nærumhverfi þeirra, hvar þau eru staðsett. Þá er jafnframt óskað eftir upplýsingum um hvort auglýsingaskilti þessi séu undanþegin og/eða samrýmast samþykkt um skilti í Reykjavík en í drögum að samþykktinni segir „að til þess að koma í veg fyrir að skilti ógni öryggi vegfarenda eru ákvæði um fjarlægðir skilta frá gatnamótum og vegbrúnum, tíðni skiptinga á myndum, hámarks ljóma skiltis og fleira.“ Þá segir jafnframt í samþykktinni að skilti „sem eru undanþegin reglum þessum skulu engu að síður taka mið af ákvæðum reglanna varðandi birtustig, öryggi og staðsetningu.“
Samkvæmt svari Bjarna Brynjólfssonar, upplýsingastjóra Reykjavíkurborgar við fyrirspurn Eyjunnar, eru um 40 slík auglýsingaskilti víðsvegar um borgina. Einnig stendur til að fjölga þeim upp í 50, en það er fyrirtækið Dengsi Billboard sem setur þau upp eftir að hafa orðið hlutskarpast í útboði Reykjavíkurborgar um strætóskýli og auglýsingaskilti.
„Áður hafði fyrirtækið AFA 20 ára samning við Reykjavíkurborg um strætóskýli með auglýsingum og auglýsingastanda. Sá samningur var útrunninn og því voru skýlin boðin út. Dengsi-Billboard mun setja upp ný skýli með þessum skjáauglýsingaskiltum. Þau eru m.a. umhverfisvænni því í hinum var notast við prentaðar auglýsingar,“
segir Bjarni. Er uppsetning skiltanna byggingarleyfisskyld.
Þá nefnir Bjarni að kostnaður borgarinnar sé enginn, þar sem rekstrarkostnaður og uppsetning sé dekkuð af auglýsingatekjum skiltanna.
„Við erum auðvitað að fá strætóskýlin frítt gegn þessum auglýsingum sem eru líka á strætóskýlunum, þau borga þetta upp.“
Aðspurður hvort hlustað yrði á óánægjuraddir borgarbúa og skiltin mögulega fjarlægð, sagðist Bjarni ekki geta lofað því að skiltin yrðu fjarlægð. Þau hefðu verið sett upp með tilliti til allra þeirra reglna og viðmiða sem ætlast væri til:
„En að sjálfsögðu munum við taka alar kvartanir til skoðunar.“
