Komið hefur fram að áform Michelle Ballarin um endurreisn WOW muni fyrst og fremst snúast um fraktflutninga á þessu stigi málsins. Þar er þorskútflutningur til Bandaríkjanna sagður spila stærstu rulluna, en unnið er að því að koma flugfélaginu í loftið innan nokkurra vikna eftir nokkrar tafir hingað til.

Sjá nánar: Ballarin ætlar að fylla vélarnar af fiski en ekki fólki

Karen kaldhæðin

Karen Kjartansdóttir, framkvæmdastjóri Samfylkingarinnar, virðist ekki trúa þessum skýringum með fraktflugið. Hún segir á Facebook:

„Já, hafa Íslendingar flutt þorskhausa á austurströnd Bandaríkjanna? Íbúar New York og Boston alveg sólgnir í þá? og hvers vegna að flytja þá með flugi? Allt mjög trúverðugt við þessi áform.“

Þarna má greina kaldhæðni í skrifum Karenar, hún efast um að bandaríkjamenn hafi mikinn áhuga á að kaupa þorskhausa, líkt og Gunnar Steinn Pálson, starfsmaður Ballarin sagði við MBL. Fjölmargir þekktir Samfylkingarmenn undir orð hennar. Þar á meðal er Helga Vala Helgadóttir, þingmaður Samfylkingarinnar, sem segir:

„Það var þarna mómentið þegar hún átti í vandræðum með útborgun fyrir flugfélagið, sem reyndist svo í heild kosta 50 milljónir, eða eins og ein kjallaraíbúð í þingholtunum. Þá fór ég aðeins að spá í hvort hún væri kannski að djóka í okkur með rekstur flugfélags. En hey…. ég vona samt enn að hún hefji í nóvember beint flug til Houston.“

Hergagnaflutningar ?

Vilhjálmur Þorsteinsson, fyrrverandi gjaldkeri Samfylkingarinnar, segir málið lykta af allt öðru en fiski:

„Þetta er farið að lykta af hergagnaflutningum? Hvað er allt þetta tal um “umsvif Bandaríkjastjórnar”? Menn hafi bakgrunn Ballarin í huga, hún er m.a. þekkt fyrir að vera milligöngumaður við sómalska vígamenn og sjóræningja.“

Þá deilir Karen frétt Daily Mail um Ballarin frá 2013, hvar hún lýsir svaðilförum sínum í Sómalíu, en hún hafi átt í samningaviðræðum við sjóræningja þaðan og átt aðild að því að þeir slepptu föngum úr haldi sínu. Þar segist hún einnig aldrei hafa unnið fyrir Bandaríkjastjórn, þó svo hún hafi átt í samskiptum við leyniþjónustu Bandaríkjanna, CIA hvar hún bauð fram aðstoð sína við að hafa uppi á hryðjuverkamönnum Al Qaeda í Afríku. Var aðstoð hennar afþökkuð.