Um helgina fóru fram þingkosningar í Póllandi, þar sem stjórnarflokkurinn Lög og réttur fékk yfir 44 prósent atkvæða. Alls tóku 2656 pólverjar búsettir á Íslandi þátt í kosningunum samkvæmt tölum frá pólska sendiráðinu, en alls eru búsettir hér tæplega 20 þúsund pólverjar samkvæmt Þjóðskrá og kosningaáhuginn því ekki mikill sé miðað við þessar tölur.

Hér á landi voru niðurstöðurnar nokkuð á skjön við heildarúrslit kosninganna, þar sem Lög og réttur fékk aðeins rúm 17 prósenta kosningu hér á landi.

Á Íslandi kusu flestir pólverjar Vinstri bandalagið, eða 729 manns, rúm 27 prósent. Flokkurinn þurrkaðist út af þingi árið 2015 en fékk nú alls 12.6 prósent atkvæða sem telst góður sigur.

Á Íslandi kusu næstflestir bandalag öfga hægriflokka, Bandalag um frelsi og sjálfstæði. Hann er samansafn minni flokka sem sumir eiga rætur í nýnasisma, en hann fékk 682 atkvæði hér á landi eða tæp 26 prósent atkvæða, en tæplega 7 prósent í Póllandi.

Þar næst kom Bandalag borgaraflokka með um 25 prósent fylgi hér á landi og 27,4 prósent í kosningunum öllum.

Á Íslandi fékk Pólska bandalagið tæp fimm prósent, en aðeins 8.6 prósent í kosningunum.

Miðað er við talningu um 90% atkvæða en endanleg úrslit liggja ekki fyrir fyrr en í dag.

Neikvæð kosningabarátta

Samkvæmt bráðabirgðaskýrslu eft­ir­lits­manna Örygg­is- og sam­vinnu­stofn­un­ar Evr­ópu (ÖSE) varpaði hlutdræg umfjöllun fjölmiðla, sér í lagi ríkisfjölmiðla, skugga á kosningarnar, þar sem grafið hafi verið undan getu kjósenda til að taka upplýsta ákvörðun í kjörklefanum.

Þá var einnig nefnt í skýrslunni að kosningabaráttan hefði gerst  neikvæðari þegar á leið, ekki síst í þar sem sigurvegarin kosninganna, stjórnarflokkurinn Lög og réttur, hafi beint spjótum sínum að hinsegin fólki og sagt það ógn við pólskt samfélag.