Póstnúmerið 102 tók gildi þann 1. október síðastliðinn. Var þess óskað af hálfu Reykjavíkurborgar að taka upp númerið vegna þeirrar uppbyggingar sem átt hefur sér stað á Vatnsmýrarsvæðinu. Samþykkt var að sá hluti póstnúmers 101 sem er sunnan Hringbrautar breytist í póstnúmerið 102 og að mörk við póstnúmer 107 og 105 haldist óbreytt. Munu því Háskóli Íslands, Háskólinn í Reykjavík, Nauthólsvík og Hlíðarendi tilheyra 102 eftir breytinguna, sem og Skerjafjörður. Kostnaðurinn við breytinguna var 2.3 milljónir hjá Íslandspósti.
Sjá má kort af póstnúmeraskiptingunni hér.
Íbúar Skerjafjarðar eru sumir hverjir ósáttir við þessa úthlutun. Bera þeir við sterkri hverfisvitund og lítils samráðs við íbúa, auk þess sem sumir telja að fasteignaverð gæti lækkað en í umsögn um málið er sagt að breytingin geti haft áhrif á húsnæðisverð, sem haldist í hendur við póstnúmer.
Samkvæmt heimildum Eyjunnar óttast sumir íbúar að hið nýja póstnúmer muni hafa ákveðinn fælingarmátt á fasteignakaupendur, þar sem póstnúmerið 101 hafi ákveðna menningar- og samfélagslega skírskotun í hugum landsmanna, sem mörgum þyki eftirsóknarvert.
Þá sé breytingin ótímabær, þar sem ekki verði séð að flugvöllurinn fari í fyrirsjáanlegri framtíð og nærtækara hefði verið að breyta póstnúmerinu í 107.
Sjá einnig: Vatnsmýrin að fá póstnúmerið 102:„Innantómt orðagjálfur á tyllidögum“
Sjá einnig: Vatnsmýrin fær póstnúmerið 102 – Kostar 2,3 milljónir
Sjá einnig: Stóra póstnúmeramálið
