Vigdís Hauksdóttir, borgarfulltrúi Miðflokksins, hefur lagt fram tillögu í borgarráði sem miðar að því að draga úr matarsóun og um leið hjálpa bágstöddum. Vigdís vill að borgin komi upp aðstöðu fyrir fyrirtæki til að skilja eftir afgangsmat eftir daginn sem fólk geti nýtt sér ókeypis. Vigdís telur að heimilislausir, fólk í neyslu, einstæðir foreldrar, flóttamenn og fleiri geti nýtt sér þetta.
Bókun Vigdísar í málinu er svohljóðandi:
Lagt er til að Reykjavíkurborg komi upp aðstöðu/matartorgi miðsvæðis í Reykjavík fyrir fyrirtæki sem eiga matvæli í lok dags og vilja koma þeim áfram ókeypis í neyslu til að minnka matarsóun.
Greinargerð: Mikil matarsóun á sér stað hér á landi sem og í öðrum löndum. Tillaga þessi er sett fram til að taka á því vandamáli. Fjölmörg fyrirtæki framleiða „matarskammta“ s.s. samlokur, salatbakka, og fleira í þeim dúr, til sölu sem hafa stuttan líftíma. Í mörgum tilfellum er um umboðssölu í verslunum að ræða og taka birgjar matvöruna til baka þegar síðasti söludagur nálgast og farga í stað þess að koma henni í neyslu.
Einnig myndu veitingahús/veitingastaðir sem framleiða matarskammta sem standa eftir í lok dags pakka matvörunni í neyslupakkningar og gefa á matartorgið. Í Reykjavík er hlutfallslega hátt hlutfall af fólki sem býr við sára fátækt og á ekki fyrir mat.
Tillagan er því nokkurs konar höfuðborgartillaga til að koma til móts við þennan hóp sem eru m.a. heimilislausir, fólk í neyslu, einstæðir foreldrar, flóttamenn, fólk í virkri neyslu og fleiri. Matartorgið yrði hrein viðbót við þær hjálparstofnanir sem þegar starfa og úthluta mat. Verði tillagan samþykkt þá nær hún tveimur mikilvægum markmiðum: að hjálpa þeim sem minnst mega sín og að minnka matarsóun.
