Sigurður Ingi Jóhannsson, samgönguráðherra Framsóknarflokksins, sagði í gær á fundi hjá framsóknarmönnum um samgöngur, að töluverðar líkur væru á því að nýr spítali myndi rísa í Keldnalandi eftir um 20 ár, þrátt fyrir að til stæði að ríkið seldi landið til að fjármagna samgöngusáttmálann, samkvæmt frétt Morgunblaðsins.
Vigdís Hauksdóttir, borgarfulltrúi Miðflokksins í Reykjavík, vakti athygli á þessu á Facebook í dag:
„Vá – samgönguráðherra er líka farinn að efna kosningáherslur/loforð Miðflokksins í Reykjavík…!!!“
Þetta er sama gagnrýni og Sigmundur Davíð hafði í frammi gegn Bjarna Benediktssyni á dögunum, þar sem hann spurði hvort ríkið væri að fjármagna kosningaloforð Samfylkingarinnar, í tengslum við samgöngusáttmálann.
Vigdís deilir einnig frétt Morgunblaðsins þar sem Sigurður Ingi tjáir sig um Keldnalandið:
„Í mínum huga er Keldnaland klárlega kostur sem ætti að skoða,“
er haft eftir Sigurði Inga, en ljáð var máls á því af lækni á fundinum að ekki ætti að selja Keldnalandið heldur reisa ætti þar spítala, en fyrir því hefur Sigmundur Davíð Gunnlaugsson, formaður Miðflokksins, talað undanfarin misseri, en hann var andvígur því að reisa spítalann við Hringbraut.
