Matthildur Ásmundardóttir bæjarstjóri Sveitarfélagsins Hornafjarðar skrifaði undir leigusamning um Stekkaklett við Hlyn Pálmason í dag. Hlynur er leikstjóri myndarinnar „Hvítur, hvítur dagur“ og ólst upp á Höfn, hvar myndin er að mestu tekin upp. Hann er einnig leikstjóri Vetrarbræðra, sem notið hefur velgengni og hylli erlendis og unnið til fjölda verðlauna. Þá hefur Hlynur einnig fengist við listmálun. Hlynur hefur verið búsettur í Danmörku, en fluttist aftur heim við gerð myndarinnar.

„Metnaðarfull áform Hlyns um að byggja upp skapandi miðstöð lista og kvikmynda með undirbúnings- og eftirvinnslustúdíói hafa alla burði til að styrkja atvinnu- og menningarlíf í sveitarfélaginu auk þeirra námstækifæra sem verkefnið býður uppá fyrir íbúa sveitarfélagsins,“

segir í tilkynningu.

Í október 2018 var auglýst eftir tillögum um nýtingu og framtíðaráform fyrir Stekkaklett þar sem óskað var eftir aðilum sem kynnu að hafa áhuga á uppbyggingu og starfsemi á lóðinni.

Húsið var byggt í upphafi sem fjarskiptastöð og er skráð þremur matshlutum sem eru samtals 155,9 m2.  Lóðarstærðin er 11.550 m2 samkvæmt teikningu.

Tillaga Hlyns Pálmasonar var valin þar sem hún þótti uppfylla allar kröfur auglýsingarinnar og þótti fela í sér nýnæmi og menningartengsl fyrir samfélagið.

„Undirskrift samnings á sama tíma og kvikmyndin „Hvítur hvítur dagur“ er forsýnd á heimavelli er mjög ánægjuleg og tengist hún Stekkakletti svo sterkt. Myndin hefur hlotið mikla velgengni um heim allan og samhliða hefur Hlynur Pálmason öðlast virðingu sem einn af hæfileikaríkustu ungu listamönnum Skandinavíu. Mun það án efa styrkja verkefnið við Stekkaklett.“

„Hvítur hvítur dagur“ verður forsýnd á Hornafirði á sunnudag þangað sem öllum íbúum sveitarfélagsins er boðið.