Bára Halldórsdóttir, sem kom upp um Klaustursþingmennina í fyrra, er óánægð með aðgengi fyrir fatlaða í sundlaug Vesturbæjar, en Bára er með sjálfsofnæmis- og gigtarsjúkdóminn Behcet’s, sem gerir henni erfitt um vik í Vesturbæjarlauginni, enda mikið um stiga og þrep.
Forstöðumaður Vesturbæjarlaugar viðurkennir að aðgengi sé ábótavant og vísar á Reykjavíkurborg en Vesturbæjarlaugin hefur undirgengist tugmilljóna króna framkvæmdir á liðnum árum, þar sem bætt var við heitum potti meðal annars, en lítið gert í aðgengismálum fyrir fatlaða.
Bára birtir myndband á Youtube þar sem hún segir sögu sína af heimsókn í Vesturbæjarlaugina, en þar var henni tjáð að enginn sérklefi væri fyrir fatlaða, en hún átti einnig erfitt með að finna sérinngang fyrir fatlaða:
„Af hverju er ekki bara stórt fokking skilti framan á Vesturbæjarlaug þar sem stendur „ekki aðgengi fyrir fatlaða“ þannig að það sé ekki bara eitthvað svona sem að allir fatlaðir þurfa að komast að,“
spyr Bára í myndbandinu. Var henni tjáð við komu sína að hún gæti fengið að nota saunuklefann, sem Báru leist ekki vel á:
„Ég þekki fullt af fötluðu fólki, sá klefi er ekkert sérstaklega aðgengilegur, því hann er ekki með neinu privacy, ef þú þarft það. Það eru alveg nokkrir sem ég þekki sem eru með fatlaða líkama, sem þeir vilja ekkert að allir séu að glápa á.“
Guðrún Arna Gylfadóttir, forstöðumaður Vesturbæjarlaugar frá 2005-2011 og aftur frá 2017, segir það rétt að aðgengi fyrir fatlaða sé ekki nógu gott í Vesturbæjarlauginni. Hinsvegar séu tilbúnar teikningar sem taki á þessu vandamáli, en þær bíði samþykkis Aðgengis- og samráðsnefndar Reykjavíkurborgar, í málefnum fatlaðs fólks:
„Reykjavíkurborg tók sig til fyrir nokkrum árum til að bæta aðgengi fatlaðra í sundlaugum. Það stóð til einnig til að bæta aðstæður í Vesturbæjarlaug, en einhverja hluta vegna slær nefndin þessu á frest. Ég tók við fyrir um einu og hálfu ári síðan og hef verið að fylgja þessu eftir, það voru gerðar teikningar um úrbætur og klefi fyrir fatlaða hannaður, en síðan hef ég verið að bíða eftir svörum frá nefndinni, um að gefa grænt ljós fyrir framkvæmdinni, þar sem þetta er kostnaðarsamt,“
segir Guðrún og nefnir að erfitt sé að koma slíkum framkvæmdum við í svo gamalli byggingu. Hún segir hinsvegar engar líkur á að húsið verði merkt með þeim hætti sem Bára vísar til:
„Það mun ekki koma til, frekar en í öðrum byggingum hjá Reykjavíkurborg, það er nokkuð ljóst. Við erum með upplýsingar um aðgengi á heimasíðu og þetta á ekki að koma mikið á óvart, en vonandi verður bætt úr þessum aðgengismálum fljótlega, það er löngu kominn tími á það,“
segir Guðrún og bendir á að öll fjármögnun umfram hefðbundinn rekstrarkostnað laugarinnar sé á herðum Reykjavíkurborgar.
Egill Þór Jónsson er fulltrúi Sjálfstæðisflokksins í Aðgengis- og samráðsnefndinni hjá Reykjavíkurborg. Hann gagnrýnir meirihlutann fyrir forgangsröðun sína:
„Það eru margar sundlaugar sem hafa setið á hakanum, skólar og frístundarmiðstöðvar til dæmis, ástandið þar er til háborinnar skammar. En það kemur ekkert á óvart, forgangsröðunin hjá þessum meirihluta hefur ekki verið upp á marga fiska þegar kemur að grunnþjónustu og öðru,“
segir Egill, en störf nefndarinnar hafa legið niðri á langan tíma:
„Nefndin hefur legið niðri núna í 7-8 mánuði, það var verið að breyta verkferlum og stokka upp í henni, meðal annars breyta nafninu á nefndinni,“
segir Egill, en hún hét áður Ferlinefnd fatlaðs fólks í Reykjavík.
Ósætti kom upp í nefndinni varðandi forgangsröðun í aðgerðaráætlun, en Egill sagði að fundað yrði um málið í ágúst og þá ætti að koma í ljós nánari tímasetningar varðandi framkvæmdir.
