Þeir sem vega að Davíð Oddssyni vega að sál og sögu Sjálfstæðisflokksins. Þetta er inntakið í nýrri grein sem Viðar Guðjohnsen skrifar í Morgunblaðið í dag. Viðar er lyfjafræðingur sem hefur verið virkur í starfi Sjálfstæðisflokksins og faðir hans og alnafni er þekktur frambjóðandi hjá flokknum sem hefur vakið mikla athygli í gegnum tíðina fyrir óvenjuleg ummæli. Davíð Oddsson var fyrr á tíð langvinsælasti stjórnmálamaður landsins. Hann á sér enn marga fylgismenn en hefur orðið umdeildari með árunum í hlutverki ritstjóra Morgunblaðsins. Langt er síðan jafn lofsamleg skrif hafa birst opinberlega um Davíð.

Fyrsta minning Viðars um foringjann Davíð Oddsson er frá því hann var sex ára en hann segir í upphafi greinar sinnar:

„Þegar ég var eitthvað um sex ára gamall vann Davíð Oddsson borgina með 60% fylgi. Það var gjöf Davíðs til Sjálfstæðisflokksins í tilefni þess að 60 ár voru liðin
frá stofnun hans. Í kjölfarið varð Davíð farsæll formaður og árvökull forsætisráðherra.“

Næsta minning sem Viðar tilgreinir í grein sinni er frá því skömmu eftir aldamótin síðustu:

„Mér er minnisstætt þegar Davíð mótmælti óhófi bankamanna í verki með því að taka sparifé sitt út úr Kaupþing Búnaðarbanka og vitna í vísu um iðrun Júdasar. Davíð
var í kjölfarið sakaður um að leggja bankamenn „í einelti“ á forsíðu Fréttablaðsins. Þetta var árið 2003.“

Viðar segir einnig að Davíð hafi staðið sig vel í starfi Seðlabankastjóra og viðvaranir hans fyrir hrun um hvert í stefndi hafi reynst réttar, en Davíð varaði við hringamyndun í viðskiptalífinu, hafi reynst réttar. Viðar gefur Davíð þessa einkunn sem forsætisráðherra:

„Sem forsætisráðherra var Davíð forsjáll, árvökull og óhræddur við að gera það sem rétt var og segja það sem þurfti að segja. Það var og er líklega hans mesti styrkur. Stefna Davíðs var að gefa borgurunum sínum frelsi. Skoðun Davíðs var þó alltaf sú að frelsi eins má ekki verða annars böl.“

Einnig kemur fram í greininni að  Viðar hafi viljað fá Davíð sem forseta lýðveldisins en eins og flestir vita vantaði þar töluvert upp á sigur Davíðs er Guðni Th. Jóhannesson var kjörinn forsetið vorið 2016. Viðar lýkur grein sinni á þessum hlýlegu orðum í garð ritstjóra Morgunblaðsins:

„Ég tók líka eftir því að hjarta Sjálfstæðisflokksins sló og slær enn í takt með Davíð Oddssyni. Menn mættu hafa það í huga að þegar menn vega að Davíð Oddssyni vega menn á sama tíma að sál og sögu flokksins. Slíkt kann ekki góðri lukku að stýra.“