Viðbrögðin við staðfestingu forsætisnefndar á áliti siðanefndar Alþingis um siðareglubrot Þórhildar Sunnu Ævarsdóttur, þingmanns Pírata, eru mörg og misjöfn, en flest halla þau í áttina að fordæmingu á vinnubrögðum forsætisnefndar í málinu.
Helgi Hrafn Gunnarsson, þingmaður Pírata, segir í færslu á Facebook í dag að hann treysti ekki forsætisnefnd til að veita leiðsögn í siðareglumálum, því hún sé fullkomlega óhæf. Segist hann hættur við að ítreka erindi sitt sem hann sendi nefndinni um allt annað mál:
„Á seinasta þingi sendi ég erindi til forsætisnefndar þar sem ég spurði um mörk milli þess að nýta aðstöðu Alþingis til þingstarfa og einkanota, þar sem þau verða hratt frekar óskýr þegar kemur t.d. að nýtingu tölvunnar frá Alþingi. Sömu tölvuna nota ég eðlilega bæði til vinnu og afþreyingar, til dæmis. Einnig sinni ég oft mínum persónulegu málum á skrifstofunni minni ef ég er staddur í miðbænum og er ekki í stuði fyrir neitt af þeim kaffihúsum sem eru opin. Stundum býð ég konunni minni í heimsókn niður á þing þegar hún á leið hjá. Vonandi hneykslar þetta nú engan, en mig langaði helst að hafa þessa línu skýra ef mögulegt var,“
segir Helgi Hrafn og nefnir að honum hafi aldrei borist svar og því hefði hann íhugað að ítreka erindið á komandi þingi:
„En í ljósi þess að forsætisnefnd er greinilega fullkomlega óhæf til að beita svo mikið sem almennri skynsemi í mati sínu, hef ég hætt við að ítreka erindið, vegna þess að satt best að segja treysti ég ekki forsætisnefnd til að veita leiðsögn í siðareglumálum.“
Helgi segir fáránlegt að sannleiksgildi fullyrðingar Þórhildar, sem hún var dæmd fyrir, skuli ekki hafa verið metið:
„Áfram mun ég velta fyrir mér þessari línu og reyni að dansa á henni eftir minni eigin sannfæringu, en ég frábið mér fyrirfram álit forsætisnefndar á nokkru sem ég segi eða geri. Siðareglur mun ég framvegis eiga alfarið við mína eigin samvisku. Það er þess virði að átta sig á því *hvers vegna* þessi niðurstaða forsætisnefndar er fáránleg. Það er ekki að þingmaður Pírata teljist brotlegur – það eitt og sér er eðlilegt þegar þingmaður Pírata brýtur siðareglur. Það sem er svo gjörsamlega úti á túni, er að sannleiksgildi fullyrðingarinnar, sem Þórhildur Sunna lét falla, er ekki metið.
Á mannamáli þýðir það, að ef spilling á sér stað á Alþingi, að þá brjóta þingmenn siðareglur með því að tala um hana. Í alvöru. Það er niðurstaðan. Þannig að tjah, já, kæra forsætisnefnd, vertu ekkert að fara yfir erindi mitt. Mig varðar ekki lengur um álit þitt á því eða siðareglum yfirhöfuð. Virðing Alþingis. Þetta hugtak virðist bara verða flóknara með tímanum.“
