„Það mætti segja að það að halda aftur af vexti og afskiptum hins opinbera sé álíka mikilvægt og að lækka skatta. Það er ábyrgð að sitja í ríkisstjórnarsamstarfi, þar þarf oft að mætast á miðri leið og gera málamiðlarnir. Sjálfstæðisflokkurinn mun samt ekki gefa eftir mikilvægu stefnu sína um öflugt atvinnulíf, frjálsara samfélag og framtaksmátt einstaklinganna. Það eru þessir þættir sem munu auka lífsgæði hér á landi, ekki vöxtur hins opinbera.“
Svo ritar Áslaug Arna Sigurbjörnsdóttir, ritari og þingmaður Sjálfstæðisflokksins, í Morgunblaðið í dag.
Þar talar hún um skattamál og þann frið sem náðist á vinnumarkaði með lífskjarasamningunum. Þá týnir Áslaug til ýmsa skatta sem flokkur hennar hefur afnumið, en viðurkennir að hugsanlega sé það ekki nóg:
„Við gerum okkur þó fulla grein fyrir því að verkefninu um skattalækkanir er hvergi nærri lokið og verður líkast til aldrei. Þingmenn Sjálfstæðisflokksins hafa lagt sitt af mörkum með málum um lækkun erfðafjárskatt, afnám stimpilgjalda o.fl. og það bíður fram á næsta þing. Það er þó rétt að minna á að við höfum náð árangri og ætlum að lækka skatta enn frekar, s.s. bankaskatt, tryggingargjald, lækka tekjuskatt frekar og þannig mætti áfram telja.“
Áslaug talar um að einfalda þurfi regluverkið þegar kemur að umhverfi fyrirtækja og segir að stefna Sjálfstæðisflokksins muni ýta undir framfarir, nýsköpun, tækniþróun og vöxt atvinnulífsins í víðu samhengi.
Tillögur Svandísar Svavarsdóttur heilbrigðisráðherra og landlæknis um að leggja hærri álögur á sykraðar vörur í nafni lýðheilsuvarna hafa mælst misjafnlega fyrir. Félag atvinnurekenda hefur mótmælt hugmyndunum harðlega og telja þetta órökrétta forræðishyggju og vísa til fyrri tilrauna með sykurskatt sem ekki gekk upp.
Vandséð er hvernig 20% hækkun á sykruðum vörum samræmist stefnu Sjálfstæðisflokksins um lægri skatta, frjálsara samfélag og minni ríkisafskipti. Áslaug minnist ekki á sykurskattinn í grein sinni beinum orðum, sem eru tíðindi út af fyrir sig.
Af orðum hennar má þó skilja að Sjálfstæðisflokkurinn hyggist ekki beita sér gegn sykurskattinum. Áslaug talar um að oft þurfi að mætast á miðri leið og gera málamiðlanir í ríkisstjórnarsamstarfi, sem hugsanlega er vísbending um að hann verði kannski ekki 20 prósent, heldur eitthvað lægri.
Áslaug nefnir einnig að Sjálfstæðisflokkurinn ætli sér ekki að gefa eftir mikilvæga stefnu sína um öflugt atvinnulíf, frjálsara samfélag og framtaksmátt einstaklinga. Hún nefnir hinsvegar ekki að Sjálfstæðisflokkurinn ætli að ríghalda í stefnu sína um lækkun skatta.
Þess má geta að á tímabilinu 2007 til 2018 voru gerðar 267 skattabreytingar á Íslandi. Alls 200 af þeim voru hækkanir á sköttum, en aðeins 67 voru lækkanir. Þetta kom fram í yfirliti Viðskiptaráðs í febrúar 2018.
Þá gerðu stjórnvöld 22 breytingar á skattkerfinu um áramótin þar-síðustu, þar sem 19 voru til hækkunar, en þrjár til lækkunar.
Á tímabilinu 2007 -2018 hafa því skattar verið hækkaðir þrisvar sinnum fyrir hverja lækkun.
Hefur Sjálfstæðisflokkurinn verið í ríkisstjórn öll þessi ár, utan fjögurra, þegar vinstri stjórnin tók við í kjölfar hrunsins, frá 2009-2013.
Katrín Jakobsdóttir, forsætisráðherra, sem mært hefur samstarf sitt við Bjarna Benediktsson fjármálaráðherra og formann Sjálfstæðisflokksins, sagði þetta í ræðu sinni á landsfundi VG í október árið 2017, rétt áður en hún myndaði ríkisstjórn með Bjarna:
„Og reyndar eru þeir þegar byrjaðir með hræðsluáróður um skattahækkanir vinstrimanna. Sjálfur skattaflokkurinn. Því hvað hefur Sjálfstæðisflokkurinn gert annað en að hækka skatta á almenning? Eða var það ekki Sjálfstæðisflokkurinn í félagi við Framsókn sem hækkaði virðisaukaskatt á matvæli á síðasta kjörtímabili? Er það ekki Sjálfstæðisflokkurinn og fylgitungl hans sem boða nú veggjöld í massavís? Er það ekki Sjálfstæðisflokkurinn sem ætlaði að hækka virðisaukaskatt á ferðaþjónustu? Sjálfstæðisflokkurinn getur lítið sagt um aðra. Hann er skattaflokkur. En við munum ekki hækka skatta á almenning í landinu heldur munum við reka sanngjarna skattastefnu.“
Sjá einnig: Viðskiptaráð:200 skattahækkanir síðan 2007
