Ríkisendurskoðandi hefur lokið úttekt á Íslandspósti ohf., sem gerð var að beiðni fjárlaganefndar Alþingis. Í tilkynningu kemur fram að á árunum 2013-2018 var uppsafnað tap Íslandspósts ohf. 246 m.kr.

Til að bregðast við greiðsluvanda félagsins ákvað Alþingi í september 2018 að veita félaginu lán, alls 500 m.kr. á 6,2% vöxtum til eins árs. Heimilt er að breyta því láni í hlutafé. Í fjárlögum 2019 er heimild til að endurlána félaginu allt að 1,5 ma. kr. og leggja félaginu til aukið eigið fé.

Það mun líklega ekki duga til, samkvæmt Ríkisendurskoðun.

Kallað eftir hagræðingu

Ríkisendurskoðandi telur að Íslandspóstur ohf. þurfi að hagræða verulega í starfsemi sinni, s.s. með sameiningu dreifikerfa og einföldun afgreiðslu á pósthúsum. Þá er eigendastefna fyrirtækisins einnig sögð ófullnægjandi:

„Ríkisendurskoðandi telur núgildandi eigendastefnu ófullnægjandi og brýnt að móta sérstaka eigendastefnu fyrir félagið vegna síbreytilegra aðstæðna og sértækra áskorana rekstrarumhverfi þess. Í þessu ljósi hefur ytra eftirliti með starfsemi Íslandspósts ohf. verið ábótavant að mati ríkisendurskoðanda.“

Aðgerðirnar dugi ekki til

Í úttekt Ríkisendurskoðunar kemur einnig fram að ekki sé tryggt að félagið þurfi ekki frekari fyrirgreiðslu, í formi aukins hlutafjár eða lánsfjár á næsta ári:

„Hækkun burðargjalda bréfa og viðbótargjald vegna erlendra sendinga, sem hvoru tveggja kemur til framkvæmda á árinu 2019, munu rétta af rekstur Íslandspósts ohf. a.m.k. um tíma. Miðað við núverandi og fyrirsjáanlegar rekstrarforsendur félagsins er það álit ríkisendurskoðanda að þessar aðgerðir dugi ekki til og því er ekki tryggt að félagið þurfi ekki á frekari fyrirgreiðslu að halda á næsta ári, hvort sem er í formi aukins hlutafjár, lánsfjár eða beinna fjárframlaga. Þá mun samkeppni á markaði eftir boðað afnám einkaréttar einnig hafa áhrif á burðargjöld og takmarka möguleika á hækkun þeirra.“

Íslandspóstur ohf. áætlar rúmlega 200 m.kr. hagnað af rekstri ársins 2019 samanborið við nær 300 m.kr. tap ársins 2018. Tekið skal fram að rekstraráætlunin hefur ekki verið uppfærð eftir að
samþykkt var heimild til að taka viðbótargjald vegna erlendra sendinga.

Lesa má skýrsluna í heild sinni hér.

Spurningar fjárlaganefndar vegna Íslandspósts ohf. og svör