Áslaug Arna Sigurbjörnsdóttir, ritari og þingmaður Sjálfstæðisflokksins, skrifar grein í Morgunblaðið í dag af tilefni 90 ára afmælis Sjálfstæðisflokksins hvar hún svarar leiðara Davíðs Oddssonar á dögunum.
Davíð, fyrrverandi formaður Sjálfstæðisflokksins og nú ritstjóri Morgunblaðsins, hneykslaðist á því að frumvarpsdrögin að nýja þungunarrofsfrumvarpinu, sem heimilar þungunarrof fram að 22. viku meðgöngu, hefði komið úr ranni Sjálfstæðisflokksins, en sagði þó fátt koma sér á óvart núorðið.
Sagði hann uppfinningamenn ekki hafa tekist að finna upp eilífðarvélina og stjórnmálaflokkar væru ekki eilífir, en í tilfelli Sjálfstæðisflokksins þyrfti það ekki að vera „harmsefni.“
Sjá nánar: Davíð Oddsson segir endalok Sjálfstæðisflokksins ekki endilega vera „harmsefni“
Áslaug Arna svarar Davíð í grein sinni og telur mikilvægt að festast ekki í fortíðinni:
„Rétt er það sem áður hefur verið haldið fram í þessu blaði að uppfinningamenn hafa lengi reynt að finna upp eilífðarvélina og ekki tekist. Því er mikilvægt að festast ekki í fortíðinni, heldur þróast í takt við nýja tíma og leiða þær óumflýjanlegu breytingar sem framtíðin mun hafa með sér fremur en að óttast þær. Við tökumst á við framtíðina með opnum hug en stöndum vörð um grunngildin sem eiga jafn mikið upp á pallborðið árið 2019 og árið 1929.“
Þá skólar Áslaug Davíð til í því hvert hlutverk Sjálfstæðisflokksins sé:
„Það er ekki hlutverk Sjálfstæðisflokksins að standa vörð um úreltar hugmyndir sem þóttu einu sinni góðar. Við gerum greinarmun á grunngildum og einstaka stefnumálum eða úrræðum sem einu sinni virkuðu. Um leið og við berum virðingu fyrir sögunni er mikilvægt að við mótum framtíðina. Styrkleiki Sjálfstæðisflokksins hefur í gegnum tíðina verið sú mikla breidd af fólki sem bæði styður og starfar í flokknum, fólk á öllum aldri og úti um allt land. Innan flokksins ríkja ólík sjónarmið um ýmis mál en stefnan stendur á traustum grunni. Í krafti fjöldans býr flokkurinn að mikilvægri reynslu þeirra sem hafa verið lengi í stjórnmálum um leið og ungt og hæfileikaríkt fólk haslar sér völl. Hvort tveggja er forsenda þess að flokkurinn vaxi og dafni.“
Sem kunnugt er þá birti Bjarni Benediktsson, formaður Sjálfstæðisflokksins, grein sína um 90 afmæli Sjálfstæðisflokksins í Fréttablaðinu, en ekki í Morgunblaðinu og ljóst að það andi köldu milli Hádegismóa og Valhallar.
