Hið sáluga Kjararáð úrskurðaði þann 21. desember árið 2011 að ríkisforstjórar ættu að fá afturvirkar launahækkanir. Var sagt að tilkynna ætti hverjum og einum forstjóra með bréfi um hvaða hækkun þeir fengu. Þau bréf voru aldrei send og engin fylgigögn virðast vera til um ákvörðun Kjararáðs í fundargerð, sem er brot á stjórnsýslulögum, að mati Hauks Arnþórssonar, stjórnsýslufræðings. Þetta kemur fram í Morgunblaðinu.

„Þrennt virðist hafa farið úrskeiðis þegar kjararáð kvað upp úrskurð sinn um afturvirka launahækkun til handa forstjórum ríkisstofnana 21. desember 2011. Þetta virðist afleit stjórnsýsla og það lítur illa út fyrir stjórnvöld ef kjararáð hefur brotið fleiri en eina lagareglu. Þá á ég við skráningarskyldu, birtingarskyldu og leiðbeiningarreglu,“

segir Haukur og bendir á að auk stjórnsýslulaga, gildi sérlög um kjararáð, en í báðum tilfellum sé gert ráð fyrir að aðilum sé tilkynnt um ákvörðun ráðsins, eða ákvörðunin birt með fullnægjandi hætti. Þá eigi aðilar málsins rétt á rökstuðningi og hafi ákveðnar kæruheimildir:

,,Það er hægt að skjóta málinu til Umboðsmanns Alþingis en meginleiðin væri að skjóta því til dómstóla. Sennilega myndi halla verulega á kjararáð vegna hugsanlegra brota á skráningarskyldu og af þeim sökum gæti myndast skaðabótaréttur hjá skjólstæðingum kjararáðs gagnvart ríkissjóði ef þeir telja að samræmis hafi ekki verið gætt,“

segir Haukur, sem skipaði 46. sæti framboðslista Sósíalistaflokks Íslands í Reykjavík fyrir síðustu sveitarstjórnarkosningar.