Rósa Björk Brynjólfsdóttir, þingmaður VG sem styður ekki ríkisstjórnarsamstarfið nema í sumum málum, hefur lagt fram fyrirspurn til utanríkisráðherra um hvers vegna Ísland hafi setið hjá þegar mannréttindaráð Sameinuðu þjóðanna samþykkti ályktun um að fylgja skyldi alþjóðlegum mannúðar- og mannréttindalögum á hernumdu svæðunum í Palestínu og réttað yfir þeim sem brytu þau.

Einnig spyr hún hvort sú hjáseta samrýmist ályktun Íslands um viðurkenningu á Palestínu sem sjálfstæðs og fullvalda ríkis innan landamæranna frá því fyrir Sex daga stríðið árið 1967 og hvort um stefnubreytingu sé að ræða af hálfu Íslands.

Fyrirspurninni hefur ekki verið svarað ennþá, en Sólveig Anna Jónsdóttir, deilir frétt Stundarinnar um málið og skrifar eftirfarandi texta:

„Mjög gott hjá henni en mikið hlýtur það að vera „skrítið“ að deila völdum með Sjálfstæðisflokknum, kyndilbera grimmdar og mannvonsku í íslenskri utanríkispólitík.“

Ályktun Sameinuðu þjóðanna var samþykkt með 23 atkvæðum gegn átta. Í henni voru hernaðaraðgerðir gegn óbreyttum borgurum fordæmdar, sem og börnum, heilbrigðisstarfsmönnum og fötluðum. Þá voru hótanir og þvingarnir gagnvart mannréttinda- og hjálparsamtökum fordæmdar og lagt til að SÞ fjölguðu starfsmönnum sem annist eftirlit með skráningu brota gegn alþjóðalögum í Palestínu.

Eins og fyrr sagði sat Ísland hjá í málinu.