Ásmundur Friðriksson, þingmaður Sjálfstæðisflokksins, vill hvorki játa því né neita við Eyjuna að hann sé andsnúinn innleiðingu þriðja orkupakkans, líkt og fullyrt er um á Viljanum í dag.

Þar er Ásmundur sagður hafa skýrt kollegum sínum í þingflokknum frá afstöðu sinni og sagður fyrsti þingmaðurinn innan stjórnarliðsins sem lýsi þessu yfir.

„Ég hef ekkert um málið að segja,“

sagði Ásmundur í samtali við Eyjuna, en aðspurður hvort hann hygðist sitja hjá, eða kjósa gegn orkupakkanum í þinginu, vildi Ásmundur ekki gefa afdráttarlaust svar:

„Málið er bara í þinglegri meðferð og við erum að skoða þessi mál. Ég vil bara ekkert vera að ræða þetta mál.“

Þá sagði Ásmundur að enginn ágreiningur væri um málið innan þingflokks Sjálfstæðisflokksins:

„Nei nei, ekki svo ég viti til, alls ekki, ég hef ekki heyrt það,“

sagði Ásmundur á hlaupum, en hann mátti ekki vera að því að ræða málið frekar, þar sem hann væri að taka á móti forseta Íslands í Keflavík.

Andstaða utan þings

Verkalýðsforystan hefur að mestu leyti lagst gegn orkupakkanum og andstaðan mælist mikil meðal almennings. Hinsvegar virðist mikill meirihluti þingheims styðja málið, utan Miðflokksins og Flokks fólksins, þó svo stöku þingmenn ríkisstjórnarinnar gætu setið hjá við afgreiðslu þess, enda undir miklum þrýstingi frá baklandi flokka sinna, ekki síst Framsóknarflokkurinn, hvers miðstjórn hefur þegar ályktað gegn orkupakkanum. Hefur Sigurður Ingi Jóhannesson, formaður Framsóknarflokksins, sagt það mikilvægt að ná sátt í málinu sem almenningur sætti sig við.