Reykjavíkurborg hefur hafist handa við að rykbinda helstu umferðargötur, en í gær fór svifryksmengun hátt yfir heilsuverndarmörkin. Líf Magneudóttir, borgarfulltrúi VG segir að óásættanlegt sé að búa við vond loftgæði:

„Svifryksmengun er heilsufarsmál og það er óásættanlegt að loftgæði mælist vond og ömurlegt að búa við slíkt. Að mestu má rekja þetta til umferðar og iðnaðar sem er auðvitað af mannanna völdum -og það sem mennirnir búa til hljóta þeir að geta upprætt.“

Hjólhestur, strætó og tveir jafnfljótir

Þá segir Líf að ýmislegt megi gera til að halda svifryki í lágmarki og segir að engum megi standa á sama, ef takast eigi að uppræta slíka mengun:

„Í dag fer borgin út með litlu sópbílana sína og þegar er hafist handa við að rykbinda. Ýmislegt annað er hægt að gera. Til dæmis skilja bílana eftir heima og taka strætó, ganga eða hjóla. Við erum að skoða það á vettvangi borgarinnar að gefa ókeypis í strætó á þessum dögum og svo erum við auðvitað að bíða eftir auknum heimildum með nýju umferðarlögunum.“

Kallar Líf eftir breyttu viðhorfi til umhverfisins og ferðamáta höfuðborgarbúa:

„Breyttar ferðavenjur eru lykilatriði í uppræta loftmengun og stemma stigu við loftslagsbreytingum af mannavöldum. Þá kemur vonandi ekki til þess að við þurfum í sífellu að vera með viðbrögð heldur erum við þar með búin að fyrirbyggja að svifryksmengun mælist yfir heilsuverndarmörkum. Vonandi gerist þetta sem fyrst og í nálægri framtíð. Þangað til reynir borgin að gera sitt allra besta í að stemma stigu við hvers kyns loftmengun.#gráirdagar“

Bannað að keyra

Í frumvarpi Sigurðar Inga Jóhannssonar, samgönguráðherra, sem nú er til umfjöllunar í umhverfis- og samgöngunefnd, er lagt til að sveitarfélögin og Vegagerðin fái heimild til að takmarka, eða banna með öllu, umferð um tiltekinn tíma þegar mengun fer yfir heilsuverndarmörk:

„Takmarkanir á umferð vegna mengunar frá ökutækjum geta t.d. falist í breytingum á hámarkshraða, takmörkun á umferð stærri ökutækja eða takmörkun almennrar umferðar með því að heimila tilteknum bifreiðum akstur á ákveðnum svæðum eftir oddatölu/jafnri endatölu eða sambærilegum endabókstaf skráningarmerkja.“