Þjóðaröryggisráð Íslands hélt sinn sjötta fund nýverið. Á vef forsætisráðuneytisins er greint frá því að á fundinum hafi verið rætt um „lýðræðislega framkvæmd kosninga og lögmæta meðferð persónuupplýsinga í aðdraganda þeirra“, en líkt og greint hefur verið frá braut Reykjavíkurborg persónuverndarlög í aðdraganda síðustu sveitarstjórnarkosninga, með sms- sendingum til ákveðinna hópa, með það að markmiði að auka kosningaþátttöku hvers hóps fyrir sig.
Forstjóri Persónuverndar, Helga Þórisdóttir, sat fund þjóðaröryggisráðsins í dag, en ekki hefur verið greint frá orðaskiptum fundargesta ennþá, enda varðar það vafalaust við þjóðaröryggi.
Hefur athæfi Reykjavíkurborgar nú verið kært til sýslumannsins á höfuðborgarsvæðinu, en það gerði Vigdí Hauksdóttir, borgarfulltrúi Miðflokksins, í dag.
Sjá má kæruna og greinargerðina hér= Greinargerð-og-kæra
Þjóðaröryggisráð Íslands var skipað árið 2016 samkvæmt frumvarpi þáverandi utanríkisráðherra og er ætlað að „hafa eftirlit með því að þjóðaröryggisstefna fyrir Ísland sé framkvæmd í samræmi við ályktun Alþingis og skal vera samráðsvettvangur um þjóðaröryggismál. Ráðinu er enn fremur ætlað að meta ástand og horfur í öryggis- og varnarmálum og fjalla um önnur málefni sem varða þjóðaröryggi. Þá gera lögin ráð fyrir að þjóðaröryggisráð, í samvinnu við háskólasamfélagið, hugveitur og fjölmiðla, beiti sér fyrir opinni og lýðræðislegri umræðu um þjóðaröryggismál.
Tilkynning forsætisráðuneytisins í heild:
„Á sjötta fundi þjóðaröryggisráðs var annars vegar rætt um lýðræðislega framkvæmd kosninga og lögmæta meðferð persónuupplýsinga í aðdraganda þeirra og hins vegar innleiðingu 5G fjarskiptastaðalsins og öryggissjónarmið varðandi birgjakeðju fjarskiptabúnaðar og annars tæknibúnaðar.Gestir fundarins voru þau Helga Þórisdóttir, forstjóri Persónuverndar, og Hrafnkell Gíslason, forstjóri Póst- og fjarskiptastofnunar. Sigurður Ingi Jóhannsson, samgöngu- og sveitarstjórnarráðherra, ásamt ráðuneytisstjóra var einnig gestur fundarins.“
Skipan þjóðaröryggisráðs:
Forsætisráðherra, formaður
Utanríkisráðherra
Dómsmálaráðherra
Ráðuneytisstjórar forsætisráðuneytis, utanríkisráðuneytis, og dómsmálaráðuneytis
Fulltrúi Slysavarnafélagsins Landsbjargar
Ríkislögreglustjóri
Forstjóri Landhelgisgæslu Íslands
Tveir þingmenn og skal annar þingmaðurinn vera úr þingflokki sem skipar meiri hluta á þingi en hinn úr þingflokki minni hluta.
Þjóðaröryggisráð getur kallað til fleiri ráðherra til setu í ráðinu varðandi einstök mál sem eru til umfjöllunar hjá ráðinu og tekur þá viðkomandi ráðuneytisstjóri einnig sæti í því.
