Páll Magnússon, þingmaður Sjálfstæðisflokksins, segir það sérkennilegt að Sigríður Á. Andersen dómsmálaráðherra haldi því fram að Páll hafi sagt að búið væri að leggja niður embætti sýslumanns í Vestmannaeyjum. „Þessu hélt ég aldrei fram. Ég sagði í ræðu minni “…að frá og með föstudeginum næsta, ekki á morgun heldur hinn, yrði enginn sýslumaður í Vestmannaeyjum“. Og það er rétt,“ segir Páll á Facebook.
Sigríður sagði í samtali við mbl í gær að sýslumaðurinn í Vestmannaeyjum muni frá næstu mánaðamótum taka að sér tímabundin störf fyrir sýslumannaráð. Ráðuneytið sendi jafnframt frá sér yfirlýsingu um að það væri rangt hjá Páli að sendinefnd ráðuneytisins hefði farið til Vestmannaeyja í embættiserindum.
Páll segir það tæknilega séð geta verið rétt: „Hinn ágæti sýslumaður á Suðurlandi fór einmitt til Vestmannaeyja þennan tiltekna dag af þessum ástæðum. En ráðuneytið lítur kannski ekki á sýslumanninn sem „starfsmann“ sinn – og það kann að vera rétt að formi til.
Eftir stendur aðalatriði málsins: Frá og með morgundeginum er „enginn sýslumaður í Vestmannaeyjum““
Málið hefur vakið athygli á því að 4.300 manna bæjarfélag er með sérstakt sýslumannsembætti á meðan sýslumenn annarsstaðar sinni heilu landshlutunum. Ekki einu sinni Reykjavík er með eigið sýslumannsembætti. Davíð Þorláksson, fyrrverandi formaður Sambands ungra sjálfstæðismanna, vekur athygli á þessu á Facebook og segir:
„Betri spurning er: Af hverju er sýslumannsembætti í Vestmannaeyjum? Það er eina sveitarfélagið með sitt eigið embætti. Ekki einu sinni Reykjavík eru með sérstakt sýslumannsembætti. Auk þess sem þau veita þjónustu sem ætti bara að vera rafræn í gegnum netið. Þangað til eru embættin sem ná yfir stór svæði með skrifstofur á nokkrum stöðum.“
