Fyrrum framkvæmdarstjórar þriggja stærstu sérsambanda ÍSÍ munu keppast í komandi sveitastjórnarkosningum í Kópavogi. Það eru þeir Geir Magnússon, fyrrum formaður  og framkvæmdarstjóri KSÍ sem er oddviti Miðflokksins, Einar Þorvarðarson, fyrrum framkvæmdarstjóri HSÍ, sem er í öðru sæti fyrir Viðreisn og Bjarta framtíð, og Pétur Hrafn Sigurðsson, fyrrum framkvæmdarstjóri KKÍ, sem er oddviti Samfylkingarinnar. Svo gæti farið að þeir tækju sæti saman í bæjarstjórn:

„Þetta er óneitanlega mjög sérstakt en dálítið skemmtilegt. Ég hef nú ekki enn hitt þá eftir að tilkynnt var um framboð Geirs. Við þekkjumst allir ágætlega enda áttum við sameiginleg baráttumál þegar við gegndum þessum störfum,“

segir Pétur Hrafn við Morgunblaðið í dag.

Hann segir að það hafi einnig verið samkeppni milli sérsambandanna og formannanna í störfum sínum:

„Já, við slógumst auðvitað um að fá bestu íþróttamennina í okkar sport. Þetta var sérstaklega á milli körfuboltans og handboltans, vetraríþróttanna. Svo börðumst við um að fá stóru fyrirtækin til að styrkja okkur en ekki hina. Þetta var bæði samvinna og slagsmál.“

Aðspurður hvort það verði reyndin nú sagði Pétur:

„Við byrjum á því að slást og svo sjáum við til hvort það verður einhver samvinna á eftir.“