Þetta er veðrið sem mér finnst leiðinlegast á Íslandi. Glærir skraufþurrir dagar. Maður fær ofbirtu í augun svo tekur á alla leið inn í heila – þeir sem hafa tilhneigingu til hausverkja draga fyrir gardínur. Engin leið að fara út án sólgleraugna. Guð hjálpi mígrenissjúklingum. Maður finnur líka hvernig húðin fer öll að þorna upp. Ég fæ skellur í andlitið á þessum árstíma. Og svo kvefast ég eins og svo oft í svona frostþurrki.

Gefið mér rigningu og rok fremur en þetta þunglyndi. Jú, birta er góð, en þessi er miskunnarlaus.

Svona getur þetta verið vikum saman síðla vetrar, gæti þess vegna staðið fram í maí.

Í þurrknum verður allt svo skítugt, sandurinn sem borinn var á göturnar meðan snjóaði þyrlast upp, það syngur óþægilega í nagladekkjunum sem spæna upp malbikið.

Og magn ryks í andrúmsloftinu verður beinlínis hættulegt heilsunni. Það er varað við því að svifryksmengun sé margfalt yfir mörkum og svo verði næstu daga. Sagt að börn og þeir sem eru viðkvæmir eigi ekki að vera á ferli nálægt stórum umferðargötum.