Birgir Ármannsson, þingmaður Sjálfstæðisflokksins, var einn þeirra þingmanna sem sátu hinn sögulega fund í Höfða í vikunni, þar sem Dagur B. Eggertsson borgarstjóri, bað Eyþór Arnalds, borgarstjóraefni Sjálfstæðisflokksins, vinsamlegast um að yfirgefa svæðið. Fundurinn var boðaður af borgarstjórn Reykjavíkur og voru þingmenn Reykjavíkur gestir fundarins. Eyþór, sem er hvorki í borgarstjórn, né þingmaður, þáði þó boð utanríkisráðherra, Guðlaugs Þórs Þórðarsonar, um að mæta.

Dagur svaraði gagnrýni Staksteina í gær, þar sem kom fram að Eyþór hafi ætlað sér að setjast í sæti sem ætlað var forsætisráðherra.

Þetta segir Birgir Ármannsson að sé ekki rétt:

„… einkennilegast í frásögn Dags og fréttaflutningi sem byggður er á henni er hvernig sæti forsætisráðherra, Katrínar Jakobsdóttur, á fundinum er allt í einu orðið eitthvað umræðuefni eða jafnvel aðalatriði í þessu sambandi. Af fréttum sumra fjölmiðla mætti ætla að Eyþór hafi reynt að bola forsætisráðherra úr sæti sínu eða verið að troðast þangað áður en hún kom í fundarherbergið, en ekkert í líkingu við það átti sér stað. Væri hægt að fara út í lengri atvikalýsingar og umfjöllun um það ef tilefni væri til. Nægir að nefna að svo stöddu að sætaskipan á fundinum var ekki niðurnjörfuð heldur frekar laus í reipum – enda þessir fundir að jafnaði ekki mjög formlegir – og enginn settist eða reyndi að setjast í sæti einhvers annars.“

Þá segir Birgir að aukaatriðin hafi orðið að aðalatriðum í fréttaflutningi af málinu:

„Umræður um stjórnmál taka stundum á sig skrýtnar myndir og enda jafnvel alveg úti í skurði. Aukaatriði verða að aðalatriðum og öfugt. Í dag hafa nokkrir fjölmiðlar fjallað um samráðsfund þingmanna Reykjavíkur og borgarfulltrúa síðastliðinn mánudag. Hefur nokkuð verið vitnað í færslu Dags B. Eggertsson í þessu sambandi þar sem hann lýsir upplifun sinni af upphafi fundarins. Ekki upplifði ég þessi atvik með sama hætti og Dagur og áttaði mig ekki alveg á taugatitringi og ofurviðkvæmni hans gagnvart því að Eyþór Arnalds kæmi sem gestur á fundinn. En látum það vera. Því máli lauk þannig að þegar Dagur hafði lýst afstöðu sinni við upphaf fundar brást Eyþór þegar við af eðlislægri kurteisi og vék af fundi. Hófust umræður í framhaldi af því og gekk fundurinn í samræmi við áætlun og væntingar.“